Америка Қўшма Штатлари президенти Дональд Трамп Беларусь раҳбари Александр Лукашенко билан телефон орқали суҳбатлашган. Мулоқот давомида 1300 нафар маҳбусни озод қилиш масаласи кўтарилган. Бу ҳақда DW нашри хабар берди.
Трампнинг қайд этишича, у Лукашенкога 16 нафар маҳбусни озод қилгани учун раҳмат айтиш мақсадида қўнғироқ қилган. Кун тартибида яна 1300 нафар маҳбусни озод қилиш масаласи ҳам турибди.
“Мен ҳурматли Беларусь президенти Александр Лукашенко билан ажойиб суҳбат қилдим. Қўнғироқдан мақсад 16 нафар маҳбусни озод қилгани учун унга миннатдорлик билдириш эди. Шунингдек, биз яна 1300 нафар маҳбусни озод қилиш масаласини муҳокама қиляпмиз. Биз кўплаб мавзуларни муҳокама қилдик, жумладан президент Путиннинг Аляскага ташрифини ҳам. Келажакда президент Лукашенко билан учрашишни интиқлик билан кутаман”, деб ёзган Америка етакчиси TruthСоcиал ижтимоий тармоғида.
Лукашенко матбуот хизматининг хабар беришича, Беларусь раҳбари Трампни Минскка таклиф қилган ва у буни қабул қилган. Америка томони эса президентнинг Минскка ташриф буюриши ҳақида ҳеч нарса демаган.
Таъкидланишича, 2020 йилда Дональд Трампнинг биринчи президентлик муддати даврида АҚШ Лукашенкони Беларуснинг қонуний президенти сифатида тан олмаслигини эълон қилган эди. АҚШ Давлат департаменти 2025 йилнинг январь ойида Беларусдаги сайловлар мавжуд репрессив шароитларда эркин ва адолатли бўлиши мумкин эмаслигини билдирган.
“Қўшма Штатлар ва кўплаб Европа давлатларининг фикрига кўра, Беларусдаги сайловлар оммавий цензура, мустақил ОАВнинг йўқлиги, фақат режим томонидан маъқулланган номзодлар иштирок эта олиши, мухолифат вакиллари қамоқда ёки сургунда бўлиш шароитида ишончли бўла олмайди”, дейилган АҚШ Давлат департаменти баёнотида.
Сергей Тихановский ва яна 13 нафар сиёсий маҳбус 2025 йилнинг июнь ойида озодликка чиқарилди. Озод қилишлар Александр Лукашенконинг Минскда Дональд Трампнинг махсус вакили Кит Келлог билан учрашувидан сўнг содир бўлган эди.
Изоҳ (0)