Халқаро ҳуқуқни бузиб Украинага ҳужум қилганидан уч ярим йил ўтгач, Россия бугун ўт очишни тўхтатиш ва жанговар ҳаракатларни тугатишга рози бўлиш имкониятига эга бўлди. Бу ҳақда Германия Федератив Республикаси канцлери Фридрих Мерц Х ижтимоий тармоғида маълум қилган.
“Биз Россия Федерацияси президенти Владимир Путин АҚШ президенти Дональд Трампнинг музокаралар ҳақидаги таклифини жиддий қабул қилишини ва Аляскадаги учрашувдан сўнг Украина билан ҳеч қандай шартларсиз мулоқотни бошлашини кутмоқдамиз”, деб ёзди Мерц.
Унинг таъкидлашича, Германия сўнгги кунларда Украина ва унинг Европадаги иттифоқчилари билан ҳамкорликда Европа ва Украина хавфсизлигининг асосий манфаатларини кафолатлайдиган тинчликка эришиш йўлини кўрсатиш устида ишламоқда.
“Мақсадимиз президент Зеленский ҳам иштирок этадиган саммит ўтказиш бўлиши керак. У ерда ўт очишни тўхтатиш бўйича келишувга эришилиши лозим. Украина кучли хавфсизлик кафолатларига муҳтож. Ҳудудий масалалар фақат украиналикларнинг розилиги билангина ҳал қилиниши мумкин. Биз бу хабарларни президент Трампга аниқ ва бир овоздан етказдик. Мен ҳозирга қадар у билан бу борада алоқада бўлиб турибман. Президент Трамп энди тинчлик сари катта қадам қўйиши мумкин”, дея таъкидлади канцлер.
Қўшимча қилинишича, Трамп ушбу ташаббус ва сўнгги кунлардаги яқин ҳамкорлик учун “миннатдорчиликка лойиқ”.
“Европалик ҳамкорлар билан сўнгги музокараларимиз давомида биз уни бундан кейин ҳам қўллаб-қувватлашимизга ишонтирдик”, дея қўшимча қилди Мерц.
Эслатиб ўтамиз, АҚШ президенти Дональд Трамп 15 август куни Аляскада россиялик ҳамкасби Владимир Путин билан учрашади
Изоҳ (0)