2025-yilning boshida fransiyalik ayol soxta Bred Pitt uchun eri bilan ajrashib, 850 ming dollar pulini yo‘qotgan ayol hikoyasi butun dunyo bo‘ylab tarqaldi. Ayol uzoq vaqt davomida internetda so‘zlashib yurgan va “davolanish uchun” minglab dollar pul jo‘natgan odam firibgar bo‘lib chiqqan. Aslida, shunga o‘xshash holatlar real hayotda juda ko‘p uchraydi. Shunchaki, qalloblar tuzog‘iga tushib qolganini tan olishga jur’at eta oladiganlar kamdir.
Bred Pitt
2023-yil boshida 55 yoshli fransuz ayoliga o‘zini Bred Pittning onasi deb tanishtirgan ayol qo‘ng‘iroq qilgan. U Bred uchun Enn (jabrlanuvchi) munosib juft bo‘lishini aytgan. Keyinchalik “Pitt”ning o‘zi Enn bilan bog‘langan. Ular deyarli bir yil davomida muloqot qilishgan va bu vaqtda Enn soxta Bredni sevib qolgan. So‘ng firibgar o‘zining og‘ir kasal ekanligi va davolanish uchun pulga muhtoj ekanligini aytgan. Natijada Enn unga katta miqdorda pul yuborishga rozi bo‘lgan.
Tom Henks
Aktyor Tom Henksning nomidan juda ko‘p jinoyatchilar foydalanadi. Ammo so‘nggi holatda uning obrazini reklama maqsadida ishlatishgan:
“Internetda mening ismim, yuz ifodam va ovozimdan mening ruxsatimsiz foydalangan holda “mo‘jizaviy” dori vositalarini targ‘ib qilish uchun ishlatishdi. Bularning barchasi mening ijozat so‘ralmay sun’iy intellekt yordamida yaratilgan. Mashaqqat bilan topgan pulingizni behuda sarflamang”, deya murojaat qildi aktyor o‘zining Instagrami’da.
Jennifer Eniston
O‘zini mashhur san’atkor sifatida ko‘rsatadigan odamlarning nishoniga ko‘pincha keksalar tushadi, chunki ular juda ishonuvchan bo‘ladi. “Jennifer Eniston” ga pul jo‘natgan 71 yoshli erkak ham shular jumlasidandir. Ismi va yoshini yashirgan yana bir aldangan shaxsning so‘zlariga ko‘ra, soxta Jennifer Eniston o‘zining tug‘ilgan kuniga taklifnoma yuborgan. Bechora qurbon tadbir uchun hatto alohida kiyim-kechak sotib olgan.
Kianu Rivz
“Men o‘zimdan boshqa hech kimni ayblamayman”, deydi o‘z mashinasida yashashga majbur bo‘lgan ayol. Ushbu voqea qurboni beva ayoldir. U bor pulini o‘zini Kianu Rivz deb tanishtirgan erkakka yuborgan. Erkak uzoq vaqt telefonda so‘zlashib, uni o‘ziga rom etgan. Hatto shaxsini tasdiqlovchi hujjat sifatida unga haydovchilik guvohnomasining rasmini ham yuborgan, albatta, u qalbaki ekanligini ayol bilmagan.
Jonni Depp
Sun’iy intellektning rivojlanishi bilan firibgarlik holatlarining soni ham ortib bormoqda. So‘nggi yillarda ayollar o‘zini Jonni Depp sifatida ko‘rsatgan erkaklarga minglab dollar jo‘natgani haqida hikoyalar ko‘payib bormoqda. “Bugungi kunda SI mening yuzim va ovozim illyuziyasini yaratishi mumkin. Lekin men ham, mening jamoam ham sizdan pul yoki shaxsiy ma’lumotlaringizni hech qachon so‘ramaymiz”, deya muxlislarini ogohlantirdi Depp.
Izoh (0)