Актриса Юлдуз Ражабова “Темп ФМ” радиосига берган интервьюсида “Мендирман Жалолиддин” сериалидаги партнёри Эмре Кивилжим билан муносабатлари ҳамда ижодидаги янгиликлар ҳақида сўзлаб берди.
Голливуд фильмидаги ижроси
— Америкаликлар томонидан суратга олинган “Тамерлан” деб номланган фильмда суратга тушдим. Ушбу фильм буюк бобокалонимиз Амир Темур ҳақида бўлиб, у ерда турли давлатлардан актёрлар рол ижро этишди. Фильмда биз инглиз тилида гаплашдик. Инглиз тилини яхши билсам-да, фильмга тайёргарлик жараёнида яна ўқиб, инглиз тилимни яхшиладим. Фильм 2025 йилда намойиш этилиши кутилмоқда, дейди актриса.
Эмре Кивилжим билан муносабатлари ҳақида
Юлдуз Ражабова турк актёри Эмре Кивилжим билан 2020 йилда “Мендирман Жалолиддин” сериалини суратга олиш жараёнларида танишган эди. Эмре сериалда бош қаҳрамон — Жалолиддинни гавдалантирган, Юлдуз эса Жалолиддиннинг севгилиси — Қутлибекани ижро этганди. Сериал тақдимотидан сўнг турк ва ўзбек ОАВларида Эмре ва Юлдузнинг ҳаётда ҳам бир-бирига нисбатан илиқ муносабатда эканлиги ҳақида хабарлар тарқалди. Сериалнинг Тошкентдаги тақдимотида Эмре ва Юлдузнинг нақадар яқин муносабатда экани ошкор бўлди.
2021 йилда Эмре Кивилжим Instagram саҳифасига Юлдуз Ражабова билан тушган суратини жойлаб, уни туғилган куни билан табриклади ҳамда “Туғилган кунинг билан, севгилим” деб ёзиб қолдирди. Ушбу пост изоҳига ўзбек шоу-бизнеси вакиллари икки ёшга бахт тилаб, самимий тилакларни ёзиб қолдиришди. Юлдуз ва Эмре бир неча бор турли маданий тадбирларда бирга иштирок этди, жуфтлик мухлисларига Дубай ва Истанбул саёҳатларида ҳам бирга кўриниш берди.
Эмре Кивилжим 2023 йилда журналист Жасур Ҳамроевга берган интервьюсида “Юлдузга бўлган севгингиз тугадими?” деган саволга “Ишқ битмас, у мозорга қадар”, деб жавоб берган эди.
Ўтган вақт ичида Юлдуз Ражабова туркиялик ҳамкасби билан муносабатларига ҳеч қандай изоҳ бермаган. Радиога берган янги интервьюсида эса актриса, аслида, Эмре билан фақат дўстона муносабатда бўлгани, дўстона қучоқлашишларни ОАВ вакиллари нотўғри талқин қилгани ҳақида гапирди.
— Эмре Кивилжим билан ҳамкасб, дўстона муносабатларимизни ОАВ вакиллари муҳаббатга йўйишди. Бизда журналистлар ўзлари ишонган нарса ҳақида гапиришни яхши кўришади. Аслида, биз бир-биримизни лойиҳа билан табриклаб қучоқлашганимиз ва бирга тушган суратларимизни турли ОАВ вакиллари ўз саҳифаларига жойлаганидан сўнг, биз ҳақимизда турли гап-сўзлар тарқалди. Буларнинг барчаси ҳақиқатдан йироқ. Бугунги кунда юрагим бўм-бўш, дейди Юлдуз Ражабова.
Бир кишига берилган икки имкон ҳақида
— Агар аёл киши муносабатларда ўзини ноқулай ҳис этса, бу муносабатлар уни хафа қилса ёки у бу муносабатларда ўзлигини йўқотиб қўйса, буни ўзгартириб бўлмайди ва бундай муносабатларни якунлаш лозим. Мен бир инсонга икки марта муносабатларни тиклаш учун имконият бердим, бироқ бу менинг хатом эди. Биласизми, аёл киши бир эркакка ишонса, у унга қалбини ва юрагини очади. Агар у инсон аёл кишининг ишончини оқламаса, бу унинг қалбига озор беради. Бундай тажрибадан сўнг сиз ўзингизга қайтасиз, сергак тортасиз, ҳамма нарсага реал кўз билан қарай бошлайсиз. Лекин ҳозир ҳам баъзан яна бир марта имкон беришим керакдир балки, деган фикрлар келади, дейди актриса.
Ўзи суратга тушган қайси клипни яхши кўради?
— “Уммон” гуруҳининг клиплари ва Улуғбек Раҳматуллаевнинг “Омадим келмади” қўшиғига ишланган клипни жуда яхши кўраман. Улар кичик лойиҳаларим бўлса-да, ёрқин хотираларга бой бўлган. Аммо бирор клипимни ҳаётимга дахлдор деб айта олмайман, дейди Юлдуз Ражабова.
“Ота-онам алоҳида яшашади”
— Ота-онам алоҳида яшашади. Онам мен ва акам билан Тошкентда, отам эса Навоийда яшайди. Отамни жуда яхши кўраман, бўш вақтим бўлди дегунча уларни кўргани бораман. Ота-онам жуда яхши муносабатларда, шунчаки отам Навоийда, онам эса биз билан яшашни хоҳлашади, дейди актриса.
Изоҳ (0)