Илон Маскнинг хAI компанияси Android ва iOS’даги барча мобил илова фойдаланувчиларига Grok Imagine сунъий интеллект тасвир ва видео генераторидан бепул фойдаланиш имкониятини тақдим этишини эълон қилди.
Илгари бу функция фақат SuperGrok ва Х Premium+ обуначилари учунгина мавжуд эди.
Grok Imagine матнли сўровлар ёки юкланган расмлар асосида 15 сониягача бўлган тасвирлар ва қисқа видеолар яратиш имконини беради. Фойдаланувчилар турли хил визуал услубларни танлашлари ва овоз билан синхронлаш функциясидан фойдаланишлари мумкин.
Бепул кириш чекланган муддатга берилмоқда. Акция доирасида фойдаланувчилар ҳар 12 соатда 5 тагача сўров юборишлари мумкин. Бепул кириш қанча вақт давом этиши ҳақида аниқ маълумот берилмаган.
Чамаси, бу қарор GPT-5 ишга туширилиши ҳамда хAI ва OpenAI, шунингдек, уларнинг раҳбарлари - Илон Маск ва Сем Алтман ўртасидаги зиддият фонида қабул қилинган. Яқинда улар Х ижтимоий тармоғида (собиқ Twitter) тортишиб қолишди. Маск Apple’ни ChatGPT иловасини тарғиб қилишда айблади, шундан сўнг Алтман ижтимоий тармоқ раҳбарини ўз саҳифасини илгари суриш учун Х’даги алгоритмларни манипуляция қилишда айблаб чиқди.
Июль ойида SpaceX компаниясининг Starlink сунъий йўлдош интернет хизмати 2,5 соат давом этган узилиш сабаб бутун дунё бўйлаб ўз фойдаланувчиларига хизмат кўрсата олмади. Компания буни ички дастурий хизматдаги носозлик билан изоҳлади.
Изоҳ (0)