“Асосий инстинкт” фильми бош қаҳрамони Шерон Стоун BBC нашрига интервью берди. Унда аткриса Голливуддаги ҳаёти, соғлиғидаги муаммолар, санъат ва сиёсат ҳақида суҳбатлашди. Аммо бир саволни эшитган 66 ёшли юлдуз тўсатдан бошини эгиб, юзини қўллари билан ёпди ва йиғлай бошлади.
Актриса ёшликда ўзингизга қандай тавсия берган бўлар эдингиз, деган саволга:
“Сен буни, албатта, уддалайсан”, дея титроқ овоз билан жавоб берди.
BBC нашри 2024 йилга кўра барчага илҳом берувчи ва ўрнак бўлувчи дунёнинг 100 аёли рейтингига Шерон Стоунни ҳам киритди. 23 йил аввал актриса оғир касалликни бошидан ўтказган: инсульт туфайли унинг ҳаёти аввал ва кейинги қисмга бўлинган.
“Сен буни ҳали билмайсан, лекин, албатта, бунинг уддасидан чиқасан”, деб такрорлади Стоун.
“Мен бу сўзларни кўзларим остига муҳрлаган бўлар эдим ва кимдир бу сўзларни ёшлигимда менга далда сифатида айтишини жуда истар эдим”.
“Ўша куни мен ерга йиқилдим ва ҳатто тез ёрдам чақира олмадим” дея сўзида давом этди актриса.
“Касалхонадан уйга қайтганимда, People журналида мени омон қоладими ёки йўқми, фақат Худога аён, деган ёзувни ўқиганимда қаттиқ саросимага тушган эдим”.
Актрисада артериянинг ёрилиши мияга қон қуйилишига олиб келган, бу эса оғир формадаги инсультни келтириб чиқарган. Стоуннинг сўзларига кўра, бундай ҳолларда омон қолиш эҳтимоли тахминан 100 дан 1 ни ташкил қилади. Голливуд юлдузи юриш, овқатланиш ва сўзлашишни қайтадан ўрганган.
Ғам-ташвиш қўшалоқ келади деганларидек, соғлиқдаги муаммолар билан бирга актриса молиявий қийинчиликларга дуч келди. Бундан ташқари, ўша йили Стоун собиқ турмуш ўртоғи Фил Бронштейн билан асраб олган ўғли Роанга васийлик қилиш учун судда курашаётган эди.
“Ўша воқеалардан кейин узоқ йиллар ўтди, ҳозир ҳаммаси яхши, барчаси ортда қолди”.
Шерон Стоун 1992 йилда экранларга чиққан “Асосий инстинкт” фильмидаги бош роли туфайли дунё миқёсида машҳурликка эришган. У ҳаёти давомида ОИВ/ОИТС касаллиларига қарши курашиш бўйича тадқиқотларни молиялаштирган, турли хайрия лойиҳаларида иштирок этган. Унинг ОИВ/ОИТСга қарши курашдаги саъй-ҳаракатлари халқаро ҳамжамият эътиборидан четда қолмади: 2013 йилда Шерон Стоун ижтимоий адолат ва тинчликка қўшган ҳиссаси учун Нобель мукофотига сазовор бўлди.
2023 йилда актрисага БМ Мухбирлар уюшмаси томонидан “Йил фуқароси” фахрий унвони берилди.
“Асосий инстинкт”дан кейин Стоун 1995 йилда Мартин Скорсезенинг “Казино” фильмида суратга тушди. Бу рол актрисага “Олтин глобус” мукофоти ва “Оскар” номинациясини олиб келди.
Туринда бўлиб ўтган кинофестивалда эса Шерон Стоун кино ривожига қўшган улкан ҳиссаси учун Stella Della Mole мукофотига сазовор бўлди.
Ҳозирда Стоун ҳаётида янги саҳифани очган. У профессионал рассом сифатида ўз санъат асарларини бутун дунё бўйлаб кўргазмаларда намойиш этиб келмоқда. Бу ҳоббига келишига Стоун пандемия даврида расм чизишга қизиқиб қолиши сабаб бўлди. У Лос Анжелесдаги уйи яқинидаги кичик студияда рассомчилик билан жиддий шуғуллана бошлаган.
Шеронга энг ёқадиган машғулот бу табиат манзараси ва мавҳум композицияларни чизишдир. Агар унга тўсатдан илҳом келиб қолса, актриса қўл остидаги ҳар қандай қалам билан сурат чизишга тайёр туради. Масалан, бир куни у пардоз анжомлари билан чиройли расм яратган.
Актрисанинг таъкидлашича, инсульт уни “бутунлай бошқа одамга” айлантирган. Бу ўзгаришлар ҳатто унинг овқатланиш одатларига ҳам таъсир қилган.
“Менинг ижтимоий доирам кескин ўзгарди. Баъзи хотиралар бутунлай ўчиб кетди, бошқалари эса, аксинча, ёдимга тушди. Ҳаётга қарашларим ҳам бутунлай ўзгариб кетди”, деди у.
Суҳбат давомида актриса сиёсат ҳақида ҳам сўз очди. Стоун очиқчасига АҚШнинг ҳозирги президенти Дональд Трампни ёқтирмаслигини, унинг сиёсий юришларига қарши эканлигини яширмади. Сайлов кунида у Камала Ҳаррисни қўллаб-қувватлашини айтган ва ижтимоий тармоқларда “Президент хоним” ёзуви туширилган футболкадаги суратини жойлаштирган.
Интервью охирида актриса журналистнинг берган саволлари учун унга миннатдорчилик билдирди ва мураккаб кунларда ҳам нолишни эмас, ўрнимиздан туриб, йўлда давом этишни танлашимиз кераклиги ҳақида мотивацион нутқ билан суҳбатни якунлади.
Изоҳ (0)