Леонардо Вилгелм Ди Каприо — америкалик актёр ва продюсер, “Олтин глобус” ва “Оскар” мукофоти совриндори. У замонамизнинг энг таниқли, истеъдодли Голливуд актёрларидан бири. Ди Каприони нафақат афсонавий “Титаник” фильми машҳур қилган, балки у фаол экология ҳимоячиси ва автомобиль ишқибози сифатида ҳам танилган.
Фото: Кинориум
Юлдузнинг автопаркида турли русумдаги автомобилларни топишингиз мумкин. Унинг ҳар бир машинасида қулайлик ва ҳашамат билан бирга табиатни сақлаб қолиш истаги намоён бўлишига гувоҳ бўлишингиз мумкин.
Tesla Roadster
Ди Каприо Tesla компаниясини қўллаб-қувватлаган биринчи юлдузлардан бири бўлган. Roadster спорт экелтромобили машиналар ишлаб чиқариш саноатига янгича ёндашув тимсолларидан бирига айланган. Мазкур модел мукаммал дизайн ва қувватни ўзида мужассам этган бўлиб, атиги 3,7 сонияда соатига 0 дан 100 километргача тезликка ўта олади.
Fisker Karma
Актёр бисотидаги автомобиллар рўйхатига Fisker Karma гибриди ҳам киритилган. Ушбу модел саноатдаги илк ҳашаматли гибрид машиналардан бири бўлган. Тўрт ўриндиқли спорткарнинг умумий қуввати 402 от кучига эга иккита электромотор билан жиҳозланган. Машина фақат электр қувватида 80 км гача, гибрид режимда эса 485 км гача юра олади. Шу билан бирга, автомобиль 5,9 сонияда 100 км/соат тезликка чиқа олади. Гибриднинг максимал тезлиги соатига 200 км га етади.
Toyota Prius
Умумий бойлиги миллионлаб доллар бўлган киноюлдуз учун бу танлов камтарона кўринади, бироқ айнан Toyota Prius бир вақтлар Ди Каприонинг экологик қадриятларга содиқлигининг намунасига айланди. Ушбу гибрид автомобиль узоқ йиллар давомида унинг асосий транспорт воситаси бўлиб келган. Машина юқори қисмида жойлашган қуёш панеллари экологик тоза двигателни қувватлантиришга ёрдам беради. Шунингдек, Toyota Prius жуда тежамкор бўлиб, 1 литр бензин билан 42 километр босиб ўтиш имконини беради.
Lexus РХ Hybrid
Ди Каприони кўпинча қимматбаҳо, аммо тежамкор кроссовер бўлган Lexus РХ Hybrid машинасини бошқараётганида учратишган. Мазкур автомобилга ўрнатилган гибрид технология ишлаб чиқариладиган чиқиндилар миқдорини камайтиради, замонавий дизайн ва кенг салон эса қулайлик бахш этади.
BMW i8
Экологияни асраб-авайлаш ҳаракатларига содиқ бўлган Леонардо BMW i8 моделини ҳам эътибордан четда қолдирмаган. Ушбу гибрид спорт автомобили ўзида кучли двигатель ва электр моторни бирлаштирган. Бундан хулоса қилиш мумкинки, Голливуд юлдузи Леонардо Ди Каприонинг машиналар коллекцияси нафақат қулайлик ва тезлик учун, балки атроф-муҳитни муҳофаза қилиш учун ҳам хизмат қилади.
Изоҳ (0)