Калифорния жанубидаги кенг кўламли ўрмон ёнғинлари сабабли АҚШ президенти Жо Байден ваколат муддати тугашидан олдинги сўнгги хорижий сафарини бекор қилди.
Оқ уй матбуот котиби Карин Жан-Пьернинг хабар беришича, Байден Лос-Анжелесдан қайтгач, у ерда полиция, ўт ўчирувчилар ва қутқарувчилар билан учрашган, шундан сўнг Италияга жўнашидан бир неча соат олдин сафарга чиқишдан воз кечган.
Байден, шунингдек, ёнғинга қарши федерал чора-тадбирларни бошқаришга эътиборини қаратмоқчи эканлигини таъкидлаб, кейинроқ қўшимча маълумот беришини ваъда қилган.
Италия ва Ватиканга ташриф жорий йилнинг 9—12 январь кунлари бўлиб ўтиши мўлжалланган эди. Италия бош вазири Жоржа Мелони, президент Сержио Маттарелла ва Рим папаси Франциск билан учрашувлар режалаштирилганди. AP агентлигининг таъкидлашича, ушбу сафар рамзий аҳамият касб этиши ва иккинчи католик президентининг фаолиятини якунлаши лозим.
Калифорния жанубидаги ёнғинлар
Лос-Анжелес атрофида камида олтита ёнғин кучаймоқда, жумладан, Тинч океани соҳилидаги Пасифик-Палисейдс ҳудудида майдони тахминан 64 квадрат километрга етган энг йирик ёнғин ўчоғи ҳам мавжуд. Ёнғинлардан бири АҚШнинг иккинчи йирик шаҳри шимоли-ғарбидаги Голливудда авж олган, олов машҳур Голливуд хиёбонига бир неча юз метр масофагача яқинлашган.
Лос-Анжелес атрофидаги ўрмон ёнғинлари оқибатида камида беш киши ҳалок бўлгани ҳақида округ шерифи Роберт Луна маълум қилди. Унинг айтишича, 130 мингдан ортиқ кишига эвакуация тўғрисида кўрсатма берилган. Аланга 1500 тагача бинони вайрон қилган. Poweroutage.us маълумотларига кўра, минтақада 300 мингдан ортиқ хонадон электр энергиясиз қолмоқда.
Изоҳ (0)