Лос Анжелесдаги ёнғин бой-у камбағални бирлаштирди: Шерон Стоун юк машиналарида озиқ-овқат тарқатди, Жейми Ли Кертис 1 миллион доллар хайрия қилди (фото)

Лос Анжелесда 7 январда бошланган ёнғинлар давом этмоқда. Сўнгги маълумотларга кўра, ҳалок бўлганлар сони 25 тага етди, юзлаб уйлар зарар кўрди ва 100 мингдан ортиқ аҳоли эвакуация қилинди.

Ёнғин машҳур Голливуд ёзуви жойлашган тепаликларга ҳам етиб борган. Ҳозирги пайтда фақат учта катта ёнғин — Вудли, Оливас ва Сансет каби ҳудудларда ёнғинлар ўчирилган. Бироқ яна бешта катта ҳудуд — Пелисейдс, Итон, Ҳерст, Лидия ва Кеннет каби жойларда табиий офат тарқалиши давом этмоқда.

Умумий етказилган зарар миқдори ҳозирча ҳисобланмаган, лекин натижалар жуда катта рақам бўлиши кутилмоқда. Калифорниядаги уйлар сейсмик хавф туфайли асосан ёғочдан қурилган. Шу ва кучли шамол сабабли ёнғинни тўлиқ ўчиришнинг иложи бўлмаган.

Кўпчилик бундай офатдан кўрилган катта талафотда Лос Анжелес мэри Карен Бассни айбламоқда. Айнан у ёнғин ва ўт ўчириш хизматлари харажатларини қисқартирган, шунингдек, ёнғин бошланган куннинг ўзидаёқ шаҳарни тарк этган. Шу сабабли ижтимоий тармоқларда уни ўз лавозимидан кетишга чақирганлар ҳам бўлди.

Калифорния аҳолиси ёнғиннинг ҳалокатли оқибатлари билан курашиш учун мустақил ҳаракат қилишига тўғри келмоқда: қўшни уйларни ўчиришда ёрдам бермоқда, бошпанасидан маҳрум бўлганларни ўз уйларида кутиб олишга тайёр эканликларини айтишмоқда. Сўнгги беш кун ичида ёнғин тахминан 10 мингта бинони йўқ қилган. Лос Анжелес ва атрофдаги шаҳарларда жойлашган меҳмонхоналарда жой қолмаган, кўпчиликнинг эса уларга тўлашга шароити йўқ.

Меган Маркл ва шаҳзода Гарри ўз дўстларини Монтесито шаҳридаги уйларида кутиб олишган. Ҳозирда эр-хотин Пасаденада бирга бўлиб, эҳтиёжмандларга овқат ва кийим тарқатишда ёрдам бермоқда. Шунингдек, улар ёнғиндан зарар кўрганларга ёрдам йиғиш учун хайрия фонди ташкил қилган.

Ёнғинлардан зарар кўрганларга ёрдам берган машҳурлар орасида Анжелина Жоли ҳам бор. У ўғли Нокс билан бирга эҳтиёжмандлар учун озиқ-овқат тарқата бошлади. Шунингдек, у Лос Фелисда уйида бир нечта инсонларга яшаш учун жой ажратди.

Шунингдек, Жейми Ли Кертис хайрия фондларига 1 миллион доллар миқдорда пул юборди, Шерон Стоун эса кийим-кечак ва озиқ-овқат билан бир нечта юк машинасини аҳолига етказиб берди. Ушбу ташаббусга опа-сингил Кардашьянлар ҳам қўшилди.

Аллақачон уйларини йўқотган машҳурлар орасида Анна Фарис, Адам Броди, Лейтон Мистер, Спенсер Пратт ва Ҳейди Монтаг, Жеймс Вудс, Евгений Леви, Майлс ва Келли Теллер, Жон Гудман ва бошқалар бор. Жумладан, Энтони Ҳопкинснинг 6 миллион долларлик уйи ҳам ёниб кетди.

Тинч океани Пелисейдс ҳудудидаги машҳурларнинг уйлари ҳам ёнғин остида қолган. У ерда Адам Сандлер, Бен Аффлек, Том Ҳэнкс ва Стивен Спилберглар хонадони бор эди.

Жеймс Вудс ҳам Лос Анжелесдаги ўзининг ҳашаматли уйини йўқотди. Маҳаллий телеканаллардан бирида 77 ёшли актёр кўз ёшларини тиёлмай, шундай деди:

“Бу худди дўзахга ўхшар эди. Атрофимиздаги ҳар бир уй ёниб кетаётганини кўриш аянчли эди”.

Мамлакат президенти Жо Байден Калифорнияда фавқулодда ҳолат эълон қилган, кўплаб ҳудудларда эвакуация жараёнлари давом этмоқда.