Жиноят ишлари бўйича Мирзо Улуғбек туман судида Тошкент шаҳрининг Яшнобод туманида содир этилган мудҳиш қотиллик — 3 ёшли болани ваҳшийларча ўлдирган 31 ёшли фуқаро иши кўрилмоқда. Суднинг навбатдаги мажлисида гувоҳлар тингланиб, сўроққа тутилди.
Судда сўз олган гувоҳлардан бирининг айтишича, қотиллик содир этилган куни ушбу қотилликда гумонланаётган шахс 1400 дона “Тропикамид” ва “Регопен” психотроп дори воситаларини қабул қилиб олиши керак бўлган.
Мен ўша куни шаҳарга бунинг (судланувчининг) олдига келаётгандим. Келиб телефон қилсам, кўтармади. Иккинчи номерига терсам хотини кўтарди. Хотини телефонда йиғлаб, шок ҳолатида гапирди, унча тушунмадим. Локация ташлаб беринг, борайчи, гаплашамиз дедим. Боиси, тоғамнинг ўғли эди, эътиборсиз қолдиролмасдим. Бордим. Борсам аёлнинг аҳволи ёмон экан. Қўли ва боши бинт қилинган экан. Нима бўлди десам, ўғлимни ва мени пичоқлади, прокуратурага кетяпман деди. Шундан сўнг мен Сергели бозорига келдим. Ўша ерда мени ходимлар ушлашди, дейди гувоҳ.
Гувоҳнинг аниқлаштиришича, у ўша куни қотилликда гумонланаётган шахснинг буюртмасига кўра, 1400 дона “Регопен” ва “Тропикамид” таблеткаларни олиб келган бўлган. Воқеа содир бўлган куни гумонланувчини тополмагани учун ўзи билан олиб юрган бўлган ва тадбирда ашёвий далиллар билан ушланган.
Локация берарди. Бориб ўша жойдан олиб, бунга олиб келиб берганим учун пул берарди. Йўл пули учун алоҳида 200-300 минг сўм олсам, хизмат ҳақи сифатида 1-1,5 миллион сўм олардим, дейди айни кунда хатти-ҳаракати учун судланиб, қамалган гувоҳ.
Қотилликда гумонланаётган шахс судьянинг бунча таблеткаларни нима мақсадда чақиртирганини сўраган саволига, “ўзим истеъмол қилардим”, дея жавоб қайтарди.
Кунига камида 13-14 та таблетка истеъмол қилардим, дейди судьянинг бу ҳақдаги саволига жавоб қайтарган судланувчи.
Мазкур судда гувоҳлик берган экспертнинг фикрича, қотилликда гумонланаётган шахснинг қонида психотроп моддалар, спиртли ичимликлар аниқланиши тўғридан тўғри физиологик аффект ҳолатини рад этади. Республика руҳий касалликлар шифохонасининг психолог-эксперти Муқаддас Рустамованинг айтишича, гумонланувчи тергов пайтида улар билан суҳбатда воқеа ҳақида гапириб, ўша куни психотроп дори истеъмол қилганини билдирган.
2024 йилнинг 8 июль куни тахминан психотроп модда — “Регопен” дори воситасини истеъмол қилган эдим. 9 июль куни соат 1:00 ларда шаръий никоҳдаги турмуш ўртоғим Назокат билан ўзаро келишмовчилик оқибатида бир-биримизни камситиб, дастлаб ўткир тиғли пичоқ билан Султонов Солиҳни тинчлантириш мақсадида бадан қисмларига бир неча маротаба шикаст етказдим. Кейин нима бўлганини эслай олмайман. Шу куни ўзимни жуда ёмон ҳис қилган эдим деган кўрсатмаларни бериб ўтган. Қолганини эса эслай олмаслигини айтган. Бу сўзлар унинг ўзининг сўзларидан ёзиб олинган, биз қўшимча киритмаймиз, деган эксперт.
Мазкур суднинг аниқлаштиришича, 2024 йилнинг 9 июль куни Яшнобод туманидаги кўп қаватли уйда ижарада яшаб келаётган 31 ёшли эркак қонуний никоҳдан ўтмасдан яшаб келган аёли билан низолашиб, унинг биринчи турмушидан туғилган ўғил фарзандига пичоқ билан тан жароҳатлари етказиб, ҳодиса жойидан яширинган. Бола шифохонага етмай вафот этган.
Изоҳ (0)