15 май куни Англиядаги руҳий хастахоналардан бирида 79 ёшида Иэн Брэйди вафот этди. У 1960-йилларда дугонаси Майра Хиндли билан бирга беш нафар бола ва ўсмирни зўрлаб, ўлдиргани билан «ном қозонган». Meduza’га кўра, қотилни ярим йил давомида кўмишнинг имкони бўлмаган.
Иэн Брэйди ва Майра Хиндли 1963–1965 йилларда Манчестер атрофида содир этган жиноятлар тарихда «ботқоқдаги қотилликлар» (Moors Murders) номини олган. Ўша пайти ҳали 30 га тўлмаган жиноятчилар 10–16 ёш орасидаги беш ўсмирни ўлдириб, таналарини Сэддлуорт яланглигида яшириб қўйган.
1963 йил 12 июлда Майра Хиндли 16 ёшли таниши Полин Ридни машинасига миндирди. Хиндли уни Сэддлуорт яланглигига олиб борди. Уларнинг ортидан воқеа жойига Иэн Брэйди мотоциклда етиб келди. У қизни зўрлаб, ўлдирди, сўнг жуфтлик танани кўмиб қўйди. Қизнинг танаси 1987 йили топилди — ўшанда жиноятчилар қотилликни тан олган эди.
Ўша йилнинг 23 ноябрида Манчестер бозорида Хиндли ва Брэйди 12 ёшли Жон Килбрайдни алдаб, яна ўша ерга олиб келди. Килбрайднинг бошига ҳам Полин Риднинг тақдири тушди.
1964 йил 16 июнида Манчестер четида 12 ёшли Кит Беннет ғойиб бўлди. Брэйди ва Хиндли уни ўлдирганликда 1980 йилларда иқрор бўлди, аммо боланинг танаси шу пайтгача топилган эмас.
26 декабрь куни Брэйди ва Хиндли ярмаркадан 10 ёшли Лесли Энн Даунини олиб кетди. У қиз ҳам ўлдирилди.
1965 йил 6 октябрида Брэйди ва Хиндли ўз уйларида 17 ёшли Эдвард Эвансни ўлдирди. Қотиллик жойида Хиндлининг қариндоши Дэвид Смит ҳам бор эди. Жиноятчилар унга танани йўқ қилишни топширди, лекин Смит полицияга мурожаат қилди, шу билан жиноий жуфтлик қўлга олинди.
1966 йил майида суд Иэн Брэйдини Жон Килбрайд, Лесли Энн Дауни ва Эдвард Эванснинг, Майра Хиндлини эса Дауни ва Эванснинг ўлимида айбдор деб топди. Улар умрбод қамоқ жазоси олди. 1985 йили Иэн Брэйди жинни деб тан олиниб, маҳбусларга мўлжалланган руҳий касалхонага жойлаштирилди. У ерда эркак журналистлар билан суҳбатлар давомида Полин Рид ва Кит Беннетни ўлдирганини тан олди.
Майра Хиндли умрининг охирига қадар қамоқдан чиқишга уринди. У 2002 йили вафот этди. Ҳеч бир дафн бюроси уни кўмиш билан шуғулланишни истамади. Натижада ўлган еридан юзлаб километр узоқда ёқиб юборилди. Хоки эса Сэддлуорт яланглигидан 15 километр наридаги боғда сочиб юборилди.
Брэйди эса кўпроқ умр кўрди ва шу йилнинг 15 майида ўлди.
Туман коронери Сефтон жиноятчининг танасини дафн учун топширишга рози бўлди, лекин битта талабни илгари сурди — унинг хоки Сэддлуорт яланглиги узра сочиб юборилиши керак эди.
Теймсайд тумани ва Олдхем шаҳри маъмурияти судга мурожаат қилиб, ниҳоят дафн масаласини ҳал қилишни сўради. 9–10 октябрь кунлари Лондон юқори суди эшитувларида келишувга эришиб бўлмади.
Натижада судья сер Жеффри Вос Брэйдини дафн этиш учун жавобгарни тайинлаш ва у дафн маросимини айнан қандай амалга оширишини белгилашга қарор қилди.
Марҳумнинг адвокати Робин Макин бундай ҳуқуқдан маҳрум этилиб, таан Теймсайд маъмурияти ходималаридан бирига берилди.
Ҳукмда, шунингдек, диний маросим ўтказиш ва мусиқа қўйиш тақиқланиши белгиланди. Бунинг бари узоқ вақт сир тутилди.
2 ноябрь куни Иэн Брэйдининг танаси 25 октябрь куни Ливерпуль қироллик шифохонасидан олиб кетилиб, Саутпорт крематорийсида ёқиб юборилгани маълум қилинди. Тунги соатларда қотилнинг хоки оғирлаштирилган идишга солиниб, Ливерпуль бандаргоҳидан денгизга қўйиб юборилди.
Бунинг бари 3 ноябрь куни жамоатчиликка ошкор этилди.
Изоҳ (0)