Самарқанд вилоятидаги туман суди раисларидан бирининг ҳайдовчиси 300 доллар пора билан ушланиб, суд ҳукмига кўра 2 йил муддатга озодликдан маҳрум қилинди. Бу ҳақда Telegram’даги “Генералиссимус” канали хабар тарқатгач, “Дарё” бу ҳақдаги суд ҳукми билан танишиб чиқди.
Судда аниқлаштирилишича, 32 ёшли судланувчи Ҳ.И. 2023 йилнинг 10 октябрь кунидан бошлаб жиноят ишлари бўйича Булунғур туман суди раиси ҳайдовчиси сифатида ишлаб келган.
У алдаш ёки ишончни суиистеъмол қилиш йўли билан ўзганинг мулкини қўлга киритиш мақсадида фуқаро Г.К.нинг ишончига кириб, Самарқанд туман судининг 2023 йил 13 сентябрдаги қарори билан 1 йил 6 ой муддатга транспорт воситасини бошқариш ҳуқуқидан маҳрум қилинган фуқаронинг ўталмай қолган жазо муддатини суд ҳамда вилоят ИИБ йўл ҳаракати хавфсизлиги органларида ишловчи танишлари орқали ҳал қилиб, ҳайдовчилик гувоҳномасини олиб беришини ваъда қилган.
Суд раисининг ҳайдовчиси 2024 йилнинг 18 июль куни келишилган 300 долларни ўзи бошқариб юрган хизмат автомобилида олган вақтида Бош прокуратура ҳузуридаги Иқтисодий жиноятларга қарши курашиш департаменти Самарқанд вилояти бошқармаси ва ДХХ вилоят бошқармаси ходимлари томонидан қўлга олинган.
Суд мажлисида сўроқ қилинган судланувчи айбига тўлиқ иқрорлик билдириб, суд аниқлаштирган ҳолатларни тасдиқлаган. Хатти-ҳаракатини эса соғлиғини тиклаш учун пул зарур бўлиб қолгани, ойлик-маошини олгач, қайтармоқчи бўлгани билан изоҳлаган.
Мазкур ишга раислик қилувчи судья Бекзод Жумабоев судланувчини Жиноят кодексининг 25,168-моддаси 1-қисми ва 28,211-моддаси 1-қисмида назарда тутилган жиноятларни содир этганликда айбдор деб топди. Собиқ ҳайдовчи узил-кесил 1 йил муддатга ҳуқуқни муҳофаза қилувчи, суд, прокуратура ва давлат иштирокидаги барча корхоналар, муассасалар ёки ташкилотларида мансабдорлик ва моддий жавобгарлик лавозимларида ишлаш ҳуқуқидан маҳрум қилиниб, 2 йил муддатга озодликдан маҳрум қилинди. Жазо манзил колонияларда ўталадиган бўлди.
Изоҳ (0)