2024 йил 18 август куни Ален Делоннинг учта фарзанди Франциянинг AFP агентлигига машҳур отасининг ўлими ҳақида хабар берди. Ален Делон 88 ёшида Парижда болалари қуршовида вафот этди. Делоннинг меросхўрлари билан муносабатлари қандайлигини ҳисобга олсак, бу тафсилот ҳайратланарли.
Ален Делонанинг тўрт фарзанди бор, аммо уч ўғли билан алоқалари жуда ёмон бўлган. Фақат қизи актёр вафотигача у билан яхши муносабатда бўлган. Кино юлдузи нима учун ўз ворисларига ҳақиқий ота бўла олмагани ҳақида гаплашамиз.
Ари Булон: тан олинмаган катта ўғил
Ален Делон билан муносабатда бўлган деярли барча аёлларнинг қалблари синган. Нико ҳам бундан мустасно эмасди (ҳақиқий исми — Криста Пеффген). У қўлида боласи билан ёлғиз қолади — 1962 йил 11 августда Нико Делондан Кристиан (кейинчалик Ари деб аташади) исмли ўғилини дунёга келтиради. “Бахтиёр” ота тўнғич фарзанди туғилганидан хурсанд бўлиш ўрнига, чақалоқни тан олмаслигини дарҳол айтади.
Сабаби актёр бўлажак рафиқаси Натали Бартелеми билан ишқий муносабатда эди. Делон Натали билан алоқасини узишни ҳам, бирор масъулиятни ўз зиммасига олишни ҳам истамасди.
Натижада масъулиятни актёрнинг онаси ва ўгай отаси ўз зиммаларига олишади, улар кичик Арини ўзлари билан олиб кетишади, унга Булон фамилиясини беришади. Бувиси ва бобоси набирасига ғамхўрлик қилишининг сабаби бор эди — Арининг онаси Нико гиёҳвандликдан азият чекарди.
1988 йилда Нико ўғли билан Испанияда дам олаётганида вафот этади — у велосипедда саёҳат пайтида юрак хуружига учрайди. “У йилнинг энг иссиқ кунида эрта тонгда вафот этди” дейди кейинчалик Ари онасининг ўлими ҳақида эслаб.
Машҳур отаси билан йигитнинг муносабатлари ҳеч қачон яхши бўлмайди — 2001 ва 2019 йилларда Ари Делонни қонуний равишда оталикни тан олиши учун судга беришга ҳаракат қилади, аммо у ҳеч қачон актёрнинг пулига даъво қилмаган. Отасининг уни ўғил сифатида тан олишни қатъиян истамаслиги Арининг қалбини оғритади. Дарвоқе, Делон шунчаки уни тан олишдан бош тортмайди — номаълум сабабларга кўра актёр шахсий учрашувларда ўғлини хафа қилишга ва камситишга уринарди.
“Сен менинг дўстимсан. Лекин бир нарсани айтиб қўяй: ўғлим эмассан, ҳеч қачон ўғлим бўла олмайсан. Бу менинг кўзларим эмас, генингдаги менинг сочларим эмас”, дейди Ален Делон ўғли Арига
Аслида Арига фақат бувиси ва бобоси ғамхўрлик қилган — онаси фақат карьерасини ўйлаган, отаси эса у ҳақда ҳатто эшитишни ҳам истамаган. Ташлаб кетилган бола омадсиз катта одамга айланади — Делоннинг бош меросхўри ўзини кинода синаб кўради, аммо муваффақиятсизликка учрайди, кейин фотографлик билан шуғулланади. Бир пайтлар у ҳатто “Муҳаббат ҳеч қачон унутмайди” китобини ҳам ёзган, унда онаси билан муносабатларини таҳлил қилган.
Афсуски, гиёҳванд моддалар билан боғлиқ муаммолар Арини ҳам четлаб ўтмайди — у бутун умри давомида бу қарамлик билан курашади. 2023 йил апрель ойида Булон ошириб юборилган доза оқибатида касалхонага ётқизилган. Бир ой ўтгач эса Париждаги квартирасида ўлик ҳолда топилган. Арининг икки фарзанди бор эди — ўғли Шарл ва қизи Бланш, аммо улар бобоси Ален билан танишми-йўқми номаълум. Отаси таъзия ҳам билдирмайди, уни ўрнига бу ишни яна бир ўғли Энтони Делон қилади.
Энтони Делон: расмий меросхўр
Делон катта ўғлидан воз кечиб, Натали Бартелемига уйланади. Ален ва Натали 1964 йил 13 августда турмуш қуришади ва ўша йилнинг 30 сентябрида уларнинг ўғли Энтони Делон дунёга келади.
Бир бутун оила, якка-ю ягона ўғил, машҳур ота-она — Энтони ҳам ҳеч кимга керак бўлмаган ва ўғил сифатида тан олинмаган акасидан воз кечадигандек туюларди. Лекин ундай бўлмайди, Делоннинг иккинчи ўғли ҳам отасининг изидан бормайди. Энтонининг эслашича, бир вақтлар у “васийсиз қолган” — 1968 йилда Ален ва Натали ажрашади, шундан сўнг улар масъулиятдан қутулиш умидида болани бир-бирига “улоқтиришади”. Аввалига Энтони ўғлини тарбиялашдан кўра кўпроқ карьераси муҳим бўлган онаси билан қолади, шунинг учун ота-она вазифасини унинг чўқинтирган отаси — санъат агенти Жорж Бом бажарган.
10 ёшида Энтони Франция пойтахти чеккасидаги хусусий пансионга жўнатилади, аммо бола у ерда яшолмайди — пансиондан тез-тез қоча бошлайди. Ўша пайтда Натали АҚШга карьера қуриш учун кетган, ўғлини собиқ эри қарамоғида қолдирганди. Делоннинг ўзи ҳам карьераси билан банд, ўғлини ўзидан узоқроқдаги навбатдаги таълим муассасасига жойлаштиришга ҳаракат қилади. Энтони 17 ёшга тўлиши биланоқ ўқишни ташлаб, Парижни забт этишга жўнайди.
Аммо бу ишга йигитнинг мураккаб ва жанжалкаш феъл-атвори тўсқинлик қилади — ёшлигида Энтонининг тажовузкорлик билан боғлиқ муаммолари бор эди. Шу сабабли 18 ёшида у автомобиль ўғирлаганликда айбланади ва 10 ойлик қамоққа ҳукм қилинади. Бу ҳар қалай киноюлдузнинг ўғлига фойда келтиради — Энтони эс-ҳушини йиғиб олиб, чарм маҳсулотларини сотиш бизнеси билан шуғуллана бошлайди, бунинг учун у ҳатто Парижнинг энг яхши ёш тадбиркори деб аталади.
Аммо кейинчалик тадбиркорлик ёш йигит учун зерикарли ишга айланади — бир неча йилдан сўнг у барибир ўзини актёрликда синаб кўришга қарор қилиб, Нью Йоркка жўнаб кетади ва 21 ёшида биринчи ролини ижро этади. Дарвоқе, машҳур ота ўғлига ҳеч қандай ёрдам бермайди — Энтонини супер юлдуз деб бўлмайди, лекин у барча ролларига ўзининг меҳнати билан эришган.
Энтонининг ҳаётида, худди акаси каби кўплаб кўтарилишлар ва тушкунликлар бўлган, отаси билан муносабатлари эса ҳар доим оғирлигича қолган.
“Мен отамдан жуда қўрқардим. Уйғонишим билан ундан қўрқишни бошлардим. У хонага кирганида, тушлик қилганимизда, машинада ўтирганимизда тушунарсиз қўрқувни ҳис қилардим. Бунга унинг ҳукмронлиги, тоқатсизлиги, менга қараши ва атиги 5 ёшимда мен билан катталардек гаплашгани сабаб бўлгандир. Ўшанда ўзимга: “Эркаклар йиғламайди”, деганман.
Йиллар ўтгани сайин Энтонининг руҳий изтироблари пасаяди — бугунги кунда у фильмларда суратга тушишдан ташқари, табиатни муҳофаза қилишда фаол иштирок этади. Унинг учта фарзанди бор — раққоса билан муносабатларидан қизи Алисон Ле Борж (ҳозирда машҳур модель) ва Софи Клерико билан турмушидан икки қизи — Лу ва Лив дунёга келган.
Анушка Делон: актёрнинг ягона қизи
1987 йилда Ален Делон голландиялик модель Розали ван Бремен билан танишади — у билан 14 йил бирга яшайди. Бу муносабатлардан икки фарзанд туғилади — 1990 йилда қизи Анушка Делон ва 1994 йилда ўғли Ален-Фабьен Делон. Меросхўрлар туғилишига қарамай, Делон Розали билан турмуш қуришни хоҳламайди, лекин у болаларни тан олади.
Делон бу болаларига бошқача муносабатда бўлган — ё ёши ўтган сайин сентиментал бўлиб қолган, ёки совуққонлиги билан танилган актёрда оталик туйғулари уйғонган. Аммо у уларни тарбиялашга, ҳатто уларнинг ҳаётида фаол иштирок этишга ҳаракат ҳам қилмайди.
Масалан, 12 ёшли Анушка кинода ўз кучини синаб кўрмоқчи бўлганида отаси унга ёрдам беради. Натижада қиз отаси билан бирга “Шер” фильмида суратга тушади. Бугунги кунда у бу соҳадаги фаолиятини давом эттирмоқда ва Францияда кино, театр ва телевидение актрисаси сифатида танилган. 2011 йилдан бошлаб эса Анушка отаси билан бир театр саҳнасида мунтазам равишда чиқишлар қила бошлайди.
Анушка Делон — Ален Делоннинг тўрт нафар фарзанди орасида қонун билан боғлиқ муаммолари бўлмаган ягона қизи. У отаси билан муносабатларини сақлаб қолган ягона фарзанд. Бугунги кунда Анушка актрисалик фаолиятини давом эттирмоқда ва 2020 йилда туғилган ўғли Линони тарбияламоқда.
Анушка ҳар доим отасига катта ҳурмат ва қўрқув билан муносабатда бўлган, у билан тушган суратларини мунтазам равишда ижтимоий тармоқларда бўлишарди.
Ален-Фабьен Делон: кенжа ўғил
1994 йилда француз киноси афсонасининг кенжа фарзанди Ален-Фабьен Делон дунёга келади. Ален Делоннинг ўзи унинг актёр бўлишига қарши эмасди, шунинг учун 9 ёшида Ален-Фабьен отаси билан “Фабио Монтале” телесериалида роль ўйнайди. Аммо меросхўр актёрликка қизиқмасди ва тез орада ота-онаси ажрашади.
Ўсмирлик давридаёқ Ален-Фабьен гиёҳванд моддалар истеъмол қила бошлайди. Онаси ўғлини даволанишга жўнатмоқчи бўлади, лекин Ален Делон ўғлини ёнига чақириб олади, бу эса фожиага олиб келади.
Делон тез-тез ишга кетиб, ўғлини ўз ҳолига ташлаб қўяди. Ушбу “тарбия” натижасида Аленнинг Париждаги квартирасида ҳар кеча базм уюштирилади. Улардан бири бахтсиз воқеа билан якунланади — Ален-Фабьен отасига тегишли тўппонча билан дўстларидан бирини яралаб қўяди. Яхшиямки, оғир яраланганига қарамай, қиз тирик қолади, аммо йигит ва унинг отаси (қурол эгаси сифатида) француз судига чақирилади. Ален-Фабьен қамалмайди — отасининг танишлари туфайли катта жарима билан қутулиб қолади.
Бугунги кунда Ален-Фабьен Делон ўзини актёрликда, шунингдек, моделлик ва ёзувчиликда синаб кўришда давом этмоқда. Аммо унинг машҳур отаси билан муносабатлари ҳам яхши бўлмаган.
Аммо Ален-Фабьеннинг опаси билан муносабатлари ҳали ҳам ёмон. Акаси Энтони Анушкани мерос бўйича фирибгарликда айблаганида Ален-Фабьен у томонида бўлади. Француз матбуотига кўра, Ален Делон барча активларининг 50 фоизини қизига, икки ўғлининг ҳар бирига эса 25 фоиздан қолдирмоқчи бўлган.
Ҳақиқатан ҳам шундай бўлганми буни вақт кўрсатади. Аммо бир нарса аёнки – экранда ўнлаб ажойиб образларни гавдалантирган актёр ҳаётидаги энг муҳим роль — ҳақиқий ота ролини ўйнай олмади.
Изоҳ (0)