Қозоғистонда рафиқаси Салтанат Нукенованинг ўлимида айбланган собиқ иқтисодиёт вазири Куандик Бишимбаев 24 йилга қамалди. Прокурор Айжан Аймаганова Бишимбаевга нисбатан чиқарилган ҳукмга изоҳ берди.
Қозоғистон Республикаси Жиноят кодексининг 99-моддаси 2-қисми (қотиллик) бўйича 20 йил, 110-модда (қийноқлар) бўйича 7 йил озодликдан маҳрум қилишни сўрадик. Бу максимал жазо. Суд ҳам худди шундай жазо тайинлади, жиноий ҳуқуқбузарликларнинг умумий сони инобатга олинган ҳолда 24 йил. Яъни, худди биз сўраганимиздек, бу тегишли моддалар бўйича максимал жазо. Амалиётга кўра, сўнгги 5 йил ичида ушбу тоифадаги ишлар бўйича судьялар иштирокидаги суд умуман умрбод қамоқ жазосини тайинлагани йўқ, — деди Аймаганова.
У Бишимбаев максимал хавфсиз муассасада сақланиши, Қозоғистоннинг бир қанча вилоятларида бундай муассасалар мавжудлигини айтди.
Жабрланган томоннинг адвокати Жанна Уразбахова Бишимбаевга нисбатан чиқарилган ҳукмини “жуда адолатли” деб атади.
Судья – ОАВ билан ҳамкорлик бўйича координатор Алма Есимова ҳукм эълон қилинганидан кейин ўтказилган матбуот анжуманида собиқ вазирнинг умрбод қамоқ жазоси бўйича судьялар бир қарорга келмаганини таъкидлади.
Умрбод қамоқ жазоси фақат якдил қарор билан тайинланиши мумкин эди, барча 11 киши овоз бериши керак эди. Шубҳасиз, умрбод қамоқ жазоси тайинланмаган экан, улар бу борада бир фикрга келмаган, — деди Есимова.
Шунингдек, у Қозоғистон суд амалиётида биринчи марта вояга етган шахсни шафқатсизларча ўлдирганлик учун 24 йил қамоқ жазоси тайинланганини таъкидлади.
Маълумот учун, сўнгги йилларда суд амалиёти шундай ривожланганки, катталарга нисбатан шафқатсизлик билан қасддан қотиллик содир этганлик учун 15 йилдан 17 йилгача жазо тайинлаш амалиёти қўлланилган. Афтидан, Бишимбаевга ҳукм чиқаришда оғирлаштирувчи ҳолатлар, жумладан, хавфли рецидив ҳолатлари мавжудлиги ҳисобга олинган, — деди у.
Салтанат Нукенованинг ўлими
2023 йилнинг 9 ноябрь куни Остонадаги ресторанлардан бирида Қозоғистон собиқ иқтисодиёт вазири Куандик Бишимбаевнинг турмуш ўртоғи Салтанат Нукенова тан жароҳатлари етказилгани оқибатида вафот этди. Ҳодисадан бир кун аввал кечқурун Бишимбаев “Бау” ресторанида рафиқаси билан жанжаллашиб қолган. Эркак илк бор Салтанат Нукеновани ҳожатхонада, кейин эса лифтдан чиқишда урган. Шундан сўнг, собиқ вазирнинг сўзларига кўра, турмуш ўртоғи рестораннинг VIP кабинасида диванга ётиб ухлаб қолган.
У 9 ноябрь куни кечқурун Нукенованинг юзи ва танаси совуқ эканлигини пайқагач, тез ёрдам чақирган. Шифокорлар аёлнинг бир кун аввал ўлганини аниқлаган.
12 ноябрь куни Бишимбаев икки ойга ҳибсга олинган. Январь ойи бошида Бишимбаев иши бўйича тергов якунланган. Собиқ вазир устидан суд жараёни 2024 йил 27 мартдан бошланган.
Маълумот ўрнида, 2018 йил мартида Бишимбаев пора олгани учун 10 йилга озодликдан маҳрум этилганди, 2019 йил февралида у афв этилган ва 2019 йил октябрь ойида шартли равишда озод қилинган. Бишимбаев 2016 йилнинг май ойи бошидан декабрь ойи охиригача Миллий иқтисодиёт вазирлигини бошқарган.
Изоҳ (0)