Jinoyat ishlari bo‘yicha Mirzo Ulug‘bek tuman sudida Toshkent shahrining Yashnobod tumanida sodir etilgan mudhish qotillik — 3 yoshli bolani vahshiylarcha o‘ldirgan 31 yoshli fuqaro ishi ko‘rilmoqda. Sudning navbatdagi majlisida guvohlar tinglanib, so‘roqqa tutildi.
Sudda so‘z olgan guvohlardan birining aytishicha, qotillik sodir etilgan kuni ushbu qotillikda gumonlanayotgan shaxs 1400 dona “Tropikamid” va “Regopen” psixotrop dori vositalarini qabul qilib olishi kerak bo‘lgan.
Men o‘sha kuni shaharga buning (sudlanuvchining) oldiga kelayotgandim. Kelib telefon qilsam, ko‘tarmadi. Ikkinchi nomeriga tersam xotini ko‘tardi. Xotini telefonda yig‘lab, shok holatida gapirdi, uncha tushunmadim. Lokatsiya tashlab bering, boraychi, gaplashamiz dedim. Boisi, tog‘amning o‘g‘li edi, e’tiborsiz qoldirolmasdim. Bordim. Borsam ayolning ahvoli yomon ekan. Qo‘li va boshi bint qilingan ekan. Nima bo‘ldi desam, o‘g‘limni va meni pichoqladi, prokuraturaga ketyapman dedi. Shundan so‘ng men Sergeli bozoriga keldim. O‘sha yerda meni xodimlar ushlashdi, deydi guvoh.
Guvohning aniqlashtirishicha, u o‘sha kuni qotillikda gumonlanayotgan shaxsning buyurtmasiga ko‘ra, 1400 dona “Regopen” va “Tropikamid” tabletkalarni olib kelgan bo‘lgan. Voqea sodir bo‘lgan kuni gumonlanuvchini topolmagani uchun o‘zi bilan olib yurgan bo‘lgan va tadbirda ashyoviy dalillar bilan ushlangan.
Lokatsiya berardi. Borib o‘sha joydan olib, bunga olib kelib berganim uchun pul berardi. Yo‘l puli uchun alohida 200-300 ming so‘m olsam, xizmat haqi sifatida 1-1,5 million so‘m olardim, deydi ayni kunda xatti-harakati uchun sudlanib, qamalgan guvoh.
Qotillikda gumonlanayotgan shaxs sudyaning buncha tabletkalarni nima maqsadda chaqirtirganini so‘ragan savoliga, “o‘zim iste’mol qilardim”, deya javob qaytardi.
Kuniga kamida 13-14 ta tabletka iste’mol qilardim, deydi sudyaning bu haqdagi savoliga javob qaytargan sudlanuvchi.
Mazkur sudda guvohlik bergan ekspertning fikricha, qotillikda gumonlanayotgan shaxsning qonida psixotrop moddalar, spirtli ichimliklar aniqlanishi to‘g‘ridan to‘g‘ri fiziologik affekt holatini rad etadi. Respublika ruhiy kasalliklar shifoxonasining psixolog-eksperti Muqaddas Rustamovaning aytishicha, gumonlanuvchi tergov paytida ular bilan suhbatda voqea haqida gapirib, o‘sha kuni psixotrop dori iste’mol qilganini bildirgan.
2024-yilning 8-iyul kuni taxminan psixotrop modda — “Regopen” dori vositasini isteʼmol qilgan edim. 9-iyul kuni soat 1:00 larda sharʼiy nikohdagi turmush o‘rtog‘im Nazokat bilan o‘zaro kelishmovchilik oqibatida bir-birimizni kamsitib, dastlab o‘tkir tig‘li pichoq bilan Sultonov Solihni tinchlantirish maqsadida badan qismlariga bir necha marotaba shikast yetkazdim. Keyin nima bo‘lganini eslay olmayman. Shu kuni o‘zimni juda yomon his qilgan edim degan ko‘rsatmalarni berib o‘tgan. Qolganini esa eslay olmasligini aytgan. Bu so‘zlar uning o‘zining so‘zlaridan yozib olingan, biz qo‘shimcha kiritmaymiz, degan ekspert.
Mazkur sudning aniqlashtirishicha, 2024-yilning 9-iyul kuni Yashnobod tumanidagi ko‘p qavatli uyda ijarada yashab kelayotgan 31 yoshli erkak qonuniy nikohdan o‘tmasdan yashab kelgan ayoli bilan nizolashib, uning birinchi turmushidan tug‘ilgan o‘g‘il farzandiga pichoq bilan tan jarohatlari yetkazib, hodisa joyidan yashiringan. Bola shifoxonaga yetmay vafot etgan.
Izoh (0)