Қашқадарё вилояти судининг кассация инстанциясида кўрилган қудалар можароси кадастр ходимлари кирдикорларини фош қилди. Натижада судлов ҳайъати прокуратурага хабарнома юборадиган бўлди. Бу ҳақда судда қатнашган “Дарё” мухбири хабар берди.
Қашқадарё вилоят судининг Фуқаролик ишлари бўйича судлов ҳайъати томонидан кўриб чиқилган қудалар можаросида Қамаши туманида ўзбошимчалик билан эгаллаб олинган ерлар кадастр ходимлари томонидан қонунийлаштириб берилгани маълум бўлди. Судлов ҳайъати раиси судья Ақанов бу ҳақда прокуратурага хабарнома юборишини билдирди.
Даъвогар Лазиз Шоҳлиевнинг судда маълумот беришича, у укасининг қайнотаси, яъни қудаси Бахтиёр Чориев билан шерикликда иш қилишга киришган. Ўзига тегишли 6 сотих ер майдонидаги яшаб келган уйини бузиб, ўрнида тўйхона қурилишига қаршилик билдирмаган. Эвазига қудасидан фоизга олганини айтган 2000 доллар пулнинг фоизини қайтармаган.
2021 йилнинг ноябрь ойида фоизга олинган пулни 3000 доллар қилиб қайтаришим керак эди. Аммо имкониятим бўлмагач, ўша олинган пулни яъни 2000 долларни қайтардим. Қолган 1000 долларни қайтаролмаганим сабаб, қудамизнинг шартига кўниб, анчадан бери яшаб келаётган уйимнинг бузилиши ва ўрнида тўйхона қурилишига розилик билдирдим. Эвазига қудамизнинг расмхона, дўкон ва аптекани менга беришига келишдик. Аслида ер менинг номимда эди, қудамиз кредит олиш учун ер менинг номимда бўлиши керак деган важ билан ерни ўзининг номига ўтказиб олди. Буни Қамашидаги нотариусда ўзим тасдиқлаб, имзо қўйдим, деди у судда бу ҳақда гапирар экан.
Лазиз Шоҳлиев ернинг 2022 йил тузилган олди-сотди шартномасида нархи атайлаб пасайтириб кўрсатилганини, аслида келишув оғизаки бўлганини айтмоқда.
Ернинг олди-сотди шартномасида унинг нархини 5 миллион сўм деб кўрсатдик. Сабаби оғзаки келишув бўйича тўйхона ёнидан қуриладиган расмхона, дўкон ва аптека менга тегиши керак эди. Лекин қудамиз ваъдасида турмади. Тўйхона қурилгач, фақат расмхонани ишлатдим. Дўконни ўзимимиз таъмирлаб олдик. Лекин қизини эга қилиб қўйди. Кейинчалик эса тўйхона-ю, расмхонани биз қурган дўкон билан қўшиб сотди, дейди у.
Судда жавобгар сифатида қатнашган Бахтиёр Чориев даъвогарнинг гапларини рад этди ва ёлғон деб атади. Шунингдек, унга берилган пулни қарзга берганини, фоиз талаб қилмаганини қўшимча қилди. Унинг айтишича, у қурган тўйхона ҳақиқатан ҳам Лазиз Шоҳлиевнинг қонуний ва ноқонуний эгалланган ерида қурилган. Тўйхона ишга тушгач 253 та тўй ўтказган. Тўйхона ичидаги расмхонани Лазиз Шоҳлиевга берган. Шунингдек, тўйхона ёнидаги дўкон ҳам қудаларига берилган.
Ҳар доим уруш жанжал бўлиб, тинч тадбиркорлик қилолмаганимдан сўнг, тўйхонани ҳам сотиб юбордим, дейди судда кўрсатма берган жавобгар.
Жавобгарнинг айтишича, у ва даъвогар Лазиз Шоҳлиев қонуний ҳужжати бўлган 6 сотих ер майдони ва ноқонуний эгаллаб олинган ҳудудда тўйхона ва дўкон қурган.
Расмхонани бердим, ҳар бир тўйдан камида 100 минг сўмдан ишлашди. Бирор бир ижара тўлов ёки солиққа ёрдам беринглар демадим. Соф даромад қилишди. Дўконни бердим. Ишлатишди. Яна пул талаб қилаверишгач, сотиб юбордим, деди тарафлар саволига жавоб берган жавобгар.
Жавобгарнинг айтишича, тўйхона ва дўкон аслида 40 сотих майдонга қурилган бўлиб, шундан 6 сотих ер майдоннинг қонуний ҳужжати бўлган. Қолган ерлар эса ўзбошимчалик билан эгаллаб олинган ерлар бўлиб, унга Қамаши туман кадастр ходимлари томонидан қонунийлаштириб берилган.
Судда сўз олган гувоҳ Тўра Каримов ҳам қудаси Бахтиёр Чориев уларни алдаганини, ваъда қилинган дўкон, расмхона ва дорихонани уларга бермаганини шунингдек, ўзлари яшаб келган уй учун ҳам пул тўламаганини маълум қилди.
Судда даъвогар Лазиз Шоҳлиевнинг адвокати Лазизга тегишли Қамаши тумани Ўрта чим қишлоғи “Ўрта Чим” МФЙ Чинорли кўчаси 110-уйни сотиш бўйича 2022 йил 10 март куни Қамаши туманидаги хусусий нотариал фаолият билан шуғулланувчи нотариус Мардон Маматов томонидан расмийлаштирилган олди-сотди шартномасини Фуқаролик кодексининг 123-124-моддалари асосида ҳақиқий эмас деб топишни сўради. Жавобгар адвокати эса даъво талабини рад этишни сўради.
Судья Ақанов бошчилигидаги судлов ҳайъати қарор қабул қилар экан, даъво талабини рад этиб, биринчи инстанция суди томонидан чиқарилган қарорни ўзгаришсиз қолдириб, 2022 йил 10 март куни тузилган олди-сотди шартномани ҳақиқий эмас деб топишни рад қилди. Шунингдек, тўйхонанинг 40 сотих ер майдонга қурилиши ва қонуний ҳужжати бўлган 6 сотих ердан ташқари ўзбошимчалик билан эгаллаб олинган ер майдонлари ва уни қонунийлаштириб берган кадастр ходимлари ҳаракати юзасидан прокуратурага хабарнома юборилишини маълум қилди.
Изоҳ (0)