“Наркологияда рўйхатда турган”. Тошкентда аёл ва унинг саккиз ойлик чақалоғи вафот этгани юзасидан қўшимча маълумот берилди

Тошкент шаҳрининг Миробод туманида она-бола вафот этгани ҳақида хабар берилган эди. “Замон” дастурида мазкур ҳолат юзасидан қўшимча маълумотлар берилди. 

Маълум қилинишича, 7 апрель куни соат 21:15 да Миробод туманида жойлашган уйнинг бирида 25 ёшли аёл ва унинг 8 ойлик ўғли вафот этгани аниқланган. Марҳумларнинг ўлими сабабини аниқлаш мақсадида суд-тиббий экспертизаси тайинланган. 

Аёл қизлик уйида икки нафар фарзанди билан яшаган. Марҳуманинг яқинларидан бирининг сўзларига кўра, ўша куни аёл дугоналари билан учрашиб, соат 18:00 ларда қайтган. 

“Дам олгани ётган. Газ мўридан кўтарилиб уйга уриб юборган. Булар ухлаб қолиб билмай қолган. Синглиси тўнғич ўғлини ёнига олиб кирганида уйғонмаган. Қараса жони узилган экан. Бошқа оила аъзоларига зарар етмаган, улар бошқа хонада бўлган”, — дейди марҳуманинг таниши. 

Шунингдек, ушбу воқеадан сўнг хонадон эгалари томонидан туман тез тиббий ёрдам хизматига мурожаат келиб тушган. Тез ёрдам ходимининг таъкидлашича, улар етиб борганда марҳуманинг жони узилганига тахминан уч соат бўлган. 

“Бу ерга 21:30 да етиб келдик. Уйнинг подвалига тушсак, она-бола жонсиз ётган ҳолатига дуч келдик. Онада ҳам болада ҳам тириклик белгилари йўқ эди. Аёлнинг яқин кишиси укаси экан. Ундан суриштирганимизда опаси беш йилдан буён наркологияда рўйхатда турар экан. Биз кирганимизда эшиклар очиқ эди. Ис газини сезмадик. Бунақа ҳолатда оғиз атрофидан кўпиклар келиб туриши мумкин. Лекин биз ундай ҳолатларни сезмадик”, — дейди ходим.

Шаҳар ФВБ ҳозирда ҳолат юзасидан маълумот бера олмаслиги, ҳолатга овқатдан заҳарланиш сабаб бўлган бўлиши ҳам мумкинлиги айтиб ўтилди. Шу мазмундаги мурожаат санитария эпидемиологик осойишталик ва жамоат саломатлиги қўмитаси Тошкент шаҳар бошқармаси ҳамда туман бўлимларига келиб тушмаган. Бу каби тахминлар ҳеч қандай асосга эга эмас. 

Ҳозирда терговга қадар текширув ҳаракатлари олиб борилмоқда.