Jinoyat ishlari bo‘yicha Mirzo Ulug‘bek tuman sudida 2024-yilning iyul oyida Toshkent shahrining Yashnobod tumanida sodir etilgan mudhish qotillik voqeasi ko‘rib chiqilmoqda. Bu haqda sudda qatnashgan “Daryo” jurnalisti xabar berdi.
Sudda so‘z olgan jabrlanuvchi ayol, marhum bolaning onasi N.N. bolasining qotilligida gumonlanayotgan eri bilan qotillik voqeasidan bir kun avval urishib qolib, uyiga ketib qolganini, eri onasiga yalinib ularni uyga qaytarganini aytdi.
Men yashamayman deb ketib qolgandim. Keyin u onamga telefon qilib, “bir onalik qiling, oxirgi marta bo‘ldi, endi hech qachon qizingizni xafa qilmayman” deb yolvorib, onamni ko‘ndirgan va bizning uyga qaytib kelishimizga sababchi bo‘lgandi. Yarim kechasi birlarda men uyga qaytib keldim. Ertasi kuni ertalab kir yuvib yurgan paytim bolam balkonda uxlayotgandi. Shu payt zalda orqamga o‘girilganimda u bolamning yoniga kirib, bolamni chap qo‘lida bo‘g‘di. Yugurib borib undan bolamni olgunimcha pichoq tiqib tashladi. Bolamni olishga uringanimda meni ham urdi. Pichoqni olib bolamni ololmaganimdan keyin men ko‘chaga yugurdim. Yugurganimdan keyin u mening orqamdan yugurib, bolani tashladi. Ungacha bolamni uning qo‘lidan olishga kuchim yetmadi. Ko‘chaga chiqib, yordam bering deb baqirdim. Qo‘shnilar baqir-chaqirni eshitgach, 102 ga xabar qilishgan ekan. Keyin bir necha xodimlar kelib, olib ketishdi. Hech qanday urush bo‘lgani yo‘q edi, shunchaki bizlar qaytib kelgandik. Kechiring deb yashay boshlagandim, dedi ayol qotillik voqeasi ro‘y bergan vaqtni yodga olar ekan.
Sudya jabrlanuvchi ona ko‘rsatmasidan keyin sudlanuvchiga yuzlanib, jabrlanuvchiga savollaringiz yoki voqea yuzasidan qo‘shimchalaringiz bormi, yuqorida aytilgan ayblovlarga iqrormisiz deya savol berdi. 31 yoshli sudlanuvchi savollari yo‘qligini, unga nisbatan aytilayotgan ayblovlarga iqrorligini bildirdi.
Shundan so‘ng sudda yana bir jabrlanuvchi, marhum bolaning haqiqiy otasi ham so‘z oldi va bilganlarini so‘zlab berdi.
Bu ayol bilan 2020-yilda tanishganman. Karantin bo‘lib qolgan paytda kvartirada birga yashab yurardik. Ijaraga kvartira olib berganman, o‘zim kelib-ketib yurardim. Shundan so‘ng sha’riy nikoh o‘qitdik va bola tug‘ildi. Bola tug‘ilgandan keyin biroz birga yashab, keyin oramiz ochildi. Munosabatlar yakunlanishiga janjallar sabab bo‘ldi. Lekin bolamning barcha ehtiyojlarini qondirib kelardim. Kasha, pampers — hamma narsasini o‘g‘lim uchun olib berardim. Kvartiraning pulini to‘lardim. Keyin ayrim sabablarga ko‘ra o‘zimda ham moddiy ahvol yaxshi bo‘lmay qoldi. Topayotgan pulim ham kamayib qolgani bois bunga “men endi kvartira pulini to‘lay olmayman. Uyingga borib yashanglar”, dedim. Shundan keyin shu tarzda yashab yurdik. Menga u qiziq bo‘lmay qoldi. Nima qilyapti, qayerda kim bilan yuribdi, umuman qiziqmas edi. Faqat o‘g‘lim qiziq bo‘lgani uchun kelib turardim, deydi marhum bolaning otasi.
Ota marhum o‘g‘lining dafn marosimini o‘zi o‘tkazganini aytmoqda.
-PTmHpq3c.jpg)
O‘sha voqea bo‘lgan kuni ertalab ishxonaga keldim. Shunda sobiq ayolimning singlisidan menga sms kelgan ekan, ko‘rsam Salih o‘lib qoldi degan. Buning o‘ziga qaytib chiqsam o‘zi ko‘tarmadi. Singlisiga qilsam, singlisi O‘zbekistonda emas, qaysidir chet davlatda ekan. Keyin uning onasi yoki onasining qaysidir jiyani menga telefon qilib aloqaga chiqdi. Men o‘shangacha 102 ga xabar qilib, “bolam qayerda yotibdi, menga aniqlab beringlar”, dedim. Ular menga topib berishdi. Bilsam Yashnobodda morgda ekan. Borib bolamni olib, Uchtepada o‘zimizning mahalladagi qabristonga ko‘mdim, dedi u.
Sobiq er ayoli, marhum bolaning onasi ham psixotrop va narkotik moddalar iste’mol qilib kelganini, bolasiga e’tiborsiz bo‘lganini aytdi. Shuningdek, suddan ayolga ham chora ko‘rishni so‘radi.
Hozir ham ekspertizaga olib borsangiz chiqadi. Men buni bilib yurardim. Tanish-bilishlar aytib berishardi. Buning hech qaysi gapiga ishonish kerak emas. Bir marta bolamni ko‘rishga borganimda bolam uyda bitta o‘zi o‘ynab yurgandi. Uyda hech kim yo‘q, ko‘chaning eshigi ochiq edi. Kirib buning uxlab yotganini ko‘rdim. Kayfdan qotib qolgan. Yuziga urib, tur desam ham turmagan. Keyin bolani olib ketganman. Olib ketganimda 102 ga qo‘ng‘iroq qilib, o‘g‘limni olib ketayotganimni, ertaga o‘g‘irlab ketdi deganda o‘zimni himoyalash uchun aytayotganimni bildirganman. Bola menikida yaxshi yashab yurgandi. U yalinib uzr so‘rab, “bolamni ber, yashay olmayman, o‘lib qolaman”, degani uchun, qolaversa uyda qarashga odam bo‘lmagani uchun qaytarib bergandim. Ona bolaga javobgarda, shu sabab bunga ham chora ko‘ring, dedi jabrlanuvchi.
Sud 2024-yilning 18-noyabr kuni soat 16:00 ga qadar tanaffus e’lon qildi.
Izoh (0)