“Надомат” лойиҳасининг навбатдаги суҳбатдоши асли наманганлик бўлиб, айни кунда жазо муддатини Зангиота туманидаги 42-сонли манзил колониясида ўтамоқда. Тўрт қизнинг онаси ва бир нечта набираларнинг бувиси бўлган аёл қилган жиноятидан пушаймон бўлган. Аммо вақт ортга қайтмайди ва жиноятлар ҳам унутилмайди.
Маҳкума — 54 ёшда, у Жиноят кодексининг 131-моддаси билан айбдор деб топилиб, 4 йилу, 10 ойга озодликдан маҳрум этилган. Аёл икки марта қўшмачилик жиноятини содир этишда айбланган.
— Ўн уч ёшимдан буён тикувчилик билан шуғулланаман. Шу ҳунаримнинг ортидан болаларимни боқдим, уларни турмушга бердим. Аммо бундай вазиятга тушаман, деб ўйлаб кўрмагандим.
Биринчи турмушимдан учта қизим бор. Яхши оилага келин бўлгандим, қайнотам оламдан ўтганидан кейин турмуш ўртоғим отасига куйиб хасталаниб қолди. Анча вақт тоби бўлмади, учта қизим билан қийналдим. Оилада кўпгина муаммолар юзага келди. Қайноғам билан бир ҳовлида турардик. Маҳалла қиз-аёллари шомдан кейин чиқишса ёки шогирд қизларим келишса, жанжал кўтарадиган бўлди. Шунда отам раҳматли келиб, “Қизим ёмон иш билан шуғулланаётгани йўқ. Агар хотин-қизларнинг уйингизга келиши ёқмаса, укангиз рўзғорни эплаб олсин”, деб гапирган. Аммо бундан кейин ҳам тинчлик бўлмади, ажрашиб кетиб, ота ҳовлимга қайтиб келдим.
Акам билан бирга яшардик, болалар ўртасидаги келишмовчилик сабаб келинойим билан муносабатларимиз бузилди. Уйга сиғмаётганим учун турмушга чиқдим. Яна бир қиз фарзандли бўлдим, аммо у турмушим ҳам узоққа чўзилмади. Тўрт бола билан яна ота ҳовлимга қайтиб келдим. Қизларим кетма-кет улғайиб, остонамиздан совчилар аримай қолди. Учта қизимни турмушга бердим ва уйимизда кичкинагина тикувчилик цехи очдим. Кенжа қизимнинг туғилган кунини нишонлайдиган кунимиз шогирд қизларимдан бири дугонаси билан келди. Ўша дугонаси ёмон ишлар билан шуғулланаркан, шогирдим “Опа, ўзингиз гаплашиб беринг, бир йигит келмоқчи”, деди. У йигит остонамга келди ва у билан гаплашиб, 100 минг сўм эвазига қизни чиқариб юбордим.
Орадан ҳеч қанча вақт ўтмай, ходимлар келиб мендан дориланган пулни олишди. Кейин билсам эски шогирдларимдан бири иш ўрганаётган қиз билан қасдлашиб қолгани учун буни уюштирган экан. “Нега мени ўйингга аралаштирдинглар”, десам “Сиз ҳам қўшилиб қолишингизни билмагандим, мен қизларни қўлга тушириб бермоқчи эдим”, деди. Тан оламан, ўша куни қизимнинг туғилган куни бўлгани учун бир кам-кўстимизга ярар деб пулни олганман. Буни судда ҳам яширганим йўқ. Бундан аввал ҳам шунга ўхшаш воқеа содир бўлганди. Яъни данғаралик шогирдларимдан бири шу иш билан шуғулланган ва цех менинг номимда бўлгани учун менга қарши иш очилган. У иш ёпилмай туриб, буниси уланиб кетгани учун мени озодликдан маҳрум этишди.
Лекин ишонч билан айтоламан, уйимда фоҳишахона сақламаганман. Чунки акам билан битта ҳовлида турамиз, унинг ўғиллари бор. Уйимизга бирорта бегона эркак кириб чиқмайди.
Озодликдан маҳрум этилганимдан кейин қизларимдан бирининг турмуши бўлмай қайтиб келибди. У 14 ёшли кенжа қизимга қараб, уйда ўтирибди. Аммо ёш болалар билан рўзғор тебратиш унга ҳам осон бўлаётгани йўқ. Яқинда ҳаммом бузилиб қолибди, қизларим нима қилишни билмай йиғлаб қўнғироқ қилишди. Оиламизда эркак кишининг йўқлиги кўп панд беради. Яхшиямки, катта куёвим яхши, кўп вазиятларда ёрдам беради. Қамалмасимдан аввал цехимизда кредит асосида бир нечта тикув машиналари харид қилгандим, пули тўланмагани учун машиналарни олиб кетишибди. Насиб қилса, озодликка чиққач, ҳаммасини қайтадан бошлайман. Бу ерда кўзларим очилди, дейди маҳкума.
Видеони тўлиқ ҳолда YouTube’даги “Дарё медиа” каналида томоша қилишингиз мумкин.
Изоҳ (0)