“Надомат” лойиҳасининг навбатдаги қаҳрамони асли водийлик бўлиб, айни дамда Зангиота туманидаги 42-сонли манзил колониясида жазо муддатини ўтамоқда.
Маҳкума 34 ёшда, у Жиноят кодексининг 168 ва 273-моддалари билан айбдор деб топилиб, олти йил-у етти ойга озодликдан маҳрум этилган.
У гиёҳванд моддаларни сотиш ва фирибгарлик жиноятларини содир этган.
— Оилада тўртинчи қиз фарзандман. Дадам раҳматли ўғил бола бўлиб туғилишимни жуда истаган экан. Аммо бирор марта бизга ўғил бола эмаслигимиздан афсусланиши ҳақида айтмаган. Болалигим жуда чиройли ўтган, мактабдаги энг аълочи ўқувчилардан бири эдим. 10 ёшимда дадамнинг юраги хуруж қилиб вафот этди, ана шундан кейин ҳаётимиз ўзгариб кетди. Онам ўша кунгача ҳеч қаерда ишламасди, фақатгина катта опам турмушга чиққан, кейинги опаларимга ҳам совчилар келиб тургандим. Иккинчи опамни турмушга бергандан кейин катта қарз бўлиб қолдик. Онам Россияга ишлагани кетишга мажбур бўлди ва мен ёлғиз қолиб кетдим. Тарбиям билан шуғулланадиган одам бўлмади.
Юқори синфда ўқиётганимда синфдошимга кўнгил қўйдим. Оила қуришимизга иккимизнинг оила аъзоларимиз ҳам қаршилик қилишди. Шундай йўл тутдикки, кейинчалик тўйга рози бўлишларига мажбур қилдик.
Фотиҳамиз бўлди, у тўйдан кейин алоҳида яшашимиз учун уй сотиб олганди. Мен ўқирдим, у эса расмий даромадга эга эмасди. Уйни таъмирлатиш учун маблағ керак бўлганида “Сени танишларингнинг номига кредит олайлик, кунлик ишда ишлаб тезда узиламан”, деди. Гапларига ишониб учта танишимнинг номига кредит расмийлаштириб олдик. Уч ой тўлади, аммо кейин ҳар хил баҳоналар қила бошлади. Бу вақтда онам Россияда эди, маҳалла нозири чақириб “Бу ҳақда онангга айтиш керак”, деди. Онамга айтмаслиги учун бошқа бировлардан қарз олиб бердим, аммо кўп ўтмай улар ҳам сўради. Хуллас, “қарз қалпоғи” ёпилмади ва ўртада маҳалла нозири билан ҳам жиддий келишмовчиликка бориб, тўйимга 20 кун қолганида қамалдим.
Энг алам қилгани аҳд-паймон қилган инсоним судга борганда “Менга судланган қиз аёллик қилолмайди”, деди. Кейинчалик сарпо учун олинган нарсаларни сотиб, қарзнинг бир қисмини узишганини эшитдим. Аммо унда имконият бор эди, ҳеч бўлмаганда уйни сотиб, бир қисми билан ҳам қарзни ёпса бўларди, аммо у бундай қилишни истамади. 19 ёшимда қамалдим ва жазо муддатимни ўтаб чиққандан кейин унга қўнғироқ қилдим. “Менга бошқа қўнғироқ қилма, уйланяпман”, деган жавобни олдим.
Ундан кейин яхши инсон билан оила қурдим, кетма-кет фарзандли бўлдик. Аммо кутилмаганда кенжа фарзандим бош мия билан боғлиқ касалликка чалинди. Уни даволатиш учун жиноят қилишга мажбур бўлдим. Тўғри, буни қораларсиз, аммо мен она сифатида шундай қилишга мажбур бўлдим. Орада отасининг оила аъзолари сабаб турмушимиз бузилди, қўлимда иккита бола, бири оғир касал.
Танишларимдан бири гиёҳванд моддани бир манзилдан бошқасига олиб борсам, 1000 доллар беришини айтди. Рози бўлдим, ундан кейин одамлардан қарз олиб, уни қайтариб беролмадим. Чунки ўша вазиятда икки ёшли боламни даволатиш учун ҳар қандай ишга тайёр эдим.
Ҳозир кўп ўйлайман, боламни ўйлабман-у, аммо мен ҳам бир онанинг фарзанди эканлигимни унутибман. Онам ҳозир 70 ёшда, ҳар ой мени кўргани келади. Ўғлим уч ёшида қамалгандим, ҳозир 6 ярим ёшга тўлди. Ҳар гал қўнғироқ қилганида “Россиядан қачон қайтасиз? Бошқа у ерларга ишлагани борманг”, дейди. У қамоқхонада эканлигимни билади, аммо айтолмайди. Балки айтишни истамас, ор қилар.
Одамнинг бошига иш тушганида ё залолат ёки ҳидоят йўлига кирар экан. Мен, афсуски, қийинчиликларга осонгина таслим бўлдим. Гиёҳванд моддаларни яширинча ташиётганда у худди мендек қанчадан қанча оналарни фарзандидан ажратиши ҳақида ўйлаб кўрмабман. Ҳозир шу кунларни эслаб кўп афсусланаман, — дейди маҳкума.
Лойиҳани YouTube’даги “Дарё медиа” каналида кузатиб боришингиз мумкин.
Изоҳ (0)