Россиялик мухолифатчи марҳум Алексей Навальнийнинг собиқ адвокати Олга Михайлова “Meduza”га берган интервьюсида Навальний қамоқхонада заҳарланиши мумкинлигидан хавотирда бўлганини маълум қилди.
“Мен паранояк (психологик бузилиш тури) бўлиб кўринишдан қўрқаман, лекин бу ерда мени заҳарлашаётганга ўхшайди, деган эди Навальний. Колонияни тарк этишим билан мен бу ҳақда дарҳол Кобзевнинг Х да ёздим, бу бизнинг адвокатимизнинг Х саҳифаси эди, — деди Михайлова интервьюда.
Михайлова Россия бош прокурори, Федерал Жазони ижро этиш хизмати директори ва Россиядаги Инсон ҳуқуқлари бўйича вакил Татьяна Москалковага мазкур масала юзасидан шикоят билан мурожаат қилган.
Михайлованинг таъкидлашича, Навальнийнинг ўлими арафасида, 15 февраль куни Москванинг Басманний суди унга нисбатан қамоққа олиш тарзидаги сиртдан эҳтиёт чорасини тайинлаган. Суд протоколига кўра, асос сифатида Михайлова ва Навальний ўртасидаги суҳбат тингланган бўлиб, унда сиёсатчи заҳарланишдан хавотирдалигини айтган.
Судья Дудар эса мен учун эҳтиёт чорасини танлаш зарурлигининг ягона далили сифатида ушбу баённомадан фойдаланган. Қолаверса, колонияга борганимизда у ердан олиб келган ва олиб чиққан барча қоғозларимиз суратга олинган, — дея таъкидлаган Михайлова.
Ҳозирда адвокат экстремистик жамиятда иштирок этганликда айбланмоқда (РФЖК 282.1-моддаси 2-қисми). Айни пайтда Михайлова Россиядан ташқарида.
Навальнийнинг уч адвокати – Вадим Кобзев, Алексей Липцер ва Игор Сергунин ўтган йилнинг октябрь ойида экстремистик жамиятда иштирок этганликда айбланиб, ҳибсга олинган эди. Ҳимоячиларни ҳибсга олиш муддати бир неча бор узайтирилган. Росфинмониторинг адвокатларни “экстремистлар ва террорчилар” рўйхатига киритган.
Тергов маълумотларига кўра, Кобзев, Липцер ва Сергунин мунтазам равишда Навальнийнинг колониядан келган мактубларини унинг шерикларига етказиб турган - шу тариқа маҳкум мухолифатчи “экстремистик жамият раҳбари ва етакчиси сифатида хизмат қилишда давом этган”. Навальний ўз ҳимоячиларининг ҳибсга олинишини “қўпол равишда қонунбузарлик” деб атаган.
Аввалроқ Bellingcat лойиҳаси терговчиси Христо Грозев журналист Михаил Зигар билан суҳбатда Навальний заҳарланган бўлиши мумкинлигини айтган эди.
Навальний 16 февраль куни Ямал-Ненецк автоном округидаги 3-сонли ахлоқ тузатиш колониясида вафот этган эди. Жазони ижро этиш федерал хизмати сиёсатчининг ўлимига тромбларнинг тўсатдан ёрилиши сабаб бўлганини даво қилган. Мухолифатчининг ҳамроҳлари Навальнийнинг ўлимини қотиллик деб атаб, унинг ортида Россия расмийлари турганини айтган.
Расмийлар Навальнийнинг жасадини онаси Людмила Навальнаяга бир ҳафтадан кўпроқ вақт давомида беришдан бош тортиб, ундан оммавий дафн маросимини ўтказмасликни талаб қилган. 1 март куни мухолифнинг дафн маросими Москвадаги Борисовский қабристонида бўлиб ўтган.
Изоҳ (0)