Эронда ҳукуматга қарши куз ва қишда давом этган намойишларнинг яна уч иштирокчиси қатл этилди, деб хабар бермоқда Iran International.
Мажид Козимий, Саид Ёқубий ва Солиҳ Мирҳошимий 2022 йил ноябрдаги намойишлар чоғида уч нафар хавфсизлик хизмати ходимини – ярим ҳарбийлаштирилган “Басиж” милициясининг икки аъзоси ва бир полициячини ўлдиришда айбдор деб топилди.
Ўлим ҳукми 19 май, жума куни эрталаб ижро этилди. Қатлдан икки кун олдин маҳкумлар қамоқхонадан хат юборган, унда улар ҳукуматни суд қарори ижросига рухсат бермасликка чақирган.
17 май куни Amnesty International инсон ҳуқуқлари ташкилоти намойишчилар устидан суд жараёнини танқид қилиб чиқди. Мажид Козимий қийноқлар остида унга туҳмат қилишганини айтганди.
Яна бир маҳкум Солиҳ Мирҳошимийнинг отаси ўғлининг қатл этилиши олдидан унинг ҳимояси учун плакат кўтарган суратини ижтимоий тармоқларга жойлаштирди. Плакатда “Менинг ўғлим айбсиз, унда қурол йўқ эди” деган ёзув бор.
Шундай қилиб, 22 ёшли Маҳса Аминийнинг ўлимидан сўнг мамлакатда бошланган намойишларда қатнашиб, қатл этилганлар сони етти кишига етди.
Iran Human Rights (Эрон Инсон ҳуқуқлари) ва Together against the Death Penalty (Биргаликда ўлим жазосига қарши) ташкилотлари маълумотларига кўра, Эрон ҳукумати 2022 йилда 582 кишини қатл қилган, бу 2021 йилга нисбатан 333 нафарга кўп. Шу билан бирга, ҳуқуқ ҳимоячилари таъкидлаганидек, 511 кишининг қатли ҳақида оммага эълон қилинмаган, Эрон расмийлари томонидан фақат 71 нафар ўлим жазоси ҳақида расман хабар берилган. Ҳуқуқ фаоллари, шунингдек, камида 16 нафар аёл ва уч нафар вояга етмаган бола қатл этилгани ҳақида хабар бермоқда.
Сентябрь ойи ўрталарида Эронда ҳижобини “нотўғри” ўрагани учун ахлоқ полицияси томонидан ҳибсга олинган 22 ёшли Маҳса Аминийнинг ўлими сабаб оммавий норозилик намойишлари бошланганди. Намойишчилар унинг ўлимида полицияни айбламоқда. Эронда икки ойлик норозилик намойишларида 300 дан ортиқ одам ҳалок бўлди, 15 мингга яқин киши ҳибсга олинди.
Ўлим жазоси яна икки журналист — Нилуфар Ҳамидий ва Элой Муҳаммадийга таҳдид солмоқда, улар Аминийнинг ўлими ҳақида биринчи бўлиб ёзган. Эрон ҳукумати уларни давлатга хиёнатда ва АҚШ разведка идоралари учун ишлаганликда айблаган.
Изоҳ (0)