Тошкент вилоятининг Бўка туманидаги туман Тиббиёт бирлашмасининг Туғуруқ бўлимидан бир эмас икки ўлик чиқди. 2024 йилнинг 20 ноябрь куни 19 ёшли аёл ва унинг эндигина туғилган қизалоғи шифокорлар қўлида жон берди. Бу ҳақда жамоатчиликка хабар берган марҳуманинг қариндошига кўра, аёл унга қилинган нотўғри укол сабаб оламдан ўтган бўлса, унинг эндигина туғилган қизалоғи эса аёлга кўрсатилаётган тиббий ёрдам пайтида она қорнида жон берган бўлиши мумкин.
“Дарё” ижодий жамоаси воқеа тафсилотларини ўрганиш мақсадида Бўка туманида бўлди.
Марҳуманинг турмуш ўртоғи ва отаси, шунингдек қариндошларига кўра, улар аёлнинг ўлимидан ўша куни кечки пайт 16:00 ва 17:00 оралиғида хабар топган.
Қон кетишдан бўлди, уч марта токка солдик, уч марта юрак ишлади, тўртинчисида юрак урмай қолди. Шундан кейин тиришиб қолди.Улар яширмоқда, аслида токка улаган пайтда бола ўлиб қолган бўлган. Кейин операция қилиб болани олишган, дейди улар.
Марҳума ўлимидан аввал онасига қўнғироқ қилиб, унга қандайдир укол қилинганини, шундан сўнг тоби қочганини маълум қилган.
Менга 13:30 лар атрофида телефон қилиб, қандайдир укол қилишди, шундан сўнг мазам бўлмаяпти, қон кетяпти деди, дейди марҳума аёлнинг онаси.
Бўка туман тиббиёт бирлашмаси бошлиғининг оналик ва болаликни муҳофаза қилиш масалалари бўйича бош шифокор ўринбосари Марҳабо Абдулазизованинг “Дарё”га билдиришича, марҳумага ҳомиладорлик пайтида муолажалар белгилаган, аёлга ҳомиладорлик ўттиз ҳафта, сийдик йўли инфекцияси ва ўткир ёғли гепатоз ташхиси қўйилган.
15 ноябрь куни аёл оилавий шифокор қабулига келган. “Янгиобод” маҳалла фуқаролар йиғинида оилавий шифокор ҳомиладор аёлни кўриб, унга сийдик йўли инфекцияси ташхисини қўйиб, ҳомиладорлик патологияси бўлимига даволанишга юборган. Ҳомиладор аёл эртаси куни туғруқхонага келиб, шифокорга “мен шифохонада ётолмайман, оилавий сабаблар туфайли уйимда даволанишга ёзиб беринг”, деб уйига даволаниш учун муолажа олишга ҳаракат қилган, дейди масъул.
Масъулнинг билдиришича, ҳомиладор аёл 20 ноябрь куни эрталабки тўртга яқин кўнгил айниши ва қайт қилиш шикоятлари билан олиб келинган.
17 ноябрь куни аёл шифохонага туғруқ бўлимига ва ҳомиладорлар патологияси бўлимига келган. Муолажалари белгиланган, лекин кун давомида аёл оилавий шароитининг оғирлигини, қайнонаси бетоблигини ва у агар шифохонада ёца, оиласига зарар етиши мумкинлигини важ қилиб, тилхат ёзиб, шифохонадан чиқиб кетган. 20 ноябрь куни эса соат эрталабки тўртга яқин кўнгил айниши ва қайт қилиш шикоятлари билан олиб келинган. Навбатчи шифокор қабул қилиб, муолажалар белгилаган. Аёлга ҳомиладорлик ўттиз ҳафта, сийдик йўли инфекцияси ва ўткир ёғли гепатос ташхиси қўйилган. Шу куни соат 14:55 да аёлнинг аҳволи бирдан ёмонлашган. Барча шифокорлар йиғилган.
Аёлнинг аҳволи ёмонлашгани туфайли фавқулодда вазият дея кесарча кесиш амалиётига олишган. Ундан аввал вилоят Перинатал маркази директор ўринбосарига мана шунақа оғир аҳволдаги аёл борлиги тўғрисида хабар берилган. Кўрсатилган ёрдамга қарамай аёлда 17:50 да ўлим ҳолати қайд қилинган. Шундан сўнг қариндошларига хабар берилган. Бош шифокор, реаниматолог, инфекционист ва акушер-гинеколог аёлнинг яқинларига хабар берган, дейди Бўка туман тиббиёт бирлашмаси бошлиғининг оналик ва болаликни муҳофаза қилиш масалалари бўйича бош шифокор ўринбосари Марҳабо Абдулазизова.
Бўка туман тиббиёт бирлашмаси бошлиғи вазифасини бажарувчи Шаҳбоз Рустамовнинг журналистга билдиришича, ҳомиладор аёлнинг нотўғри укол қилиниши оқибатида вафот этганини айнан аёлга қараган шифокор инкор этган. Бош шифокор марҳума ўлимида шифокорларнинг айби йўқ деб ҳисоблайди.
Бемор қаровсиз қолиб кетганда шифокорлар айбдор десак бўларди. Бу ҳолатда шифокорлар эътиборсизлик қилмаган, дейди туман бош шифокори.
Бўкаликлар туманда малакали шифокорлар камлигини, ҳомиладор қизларини туман шифохонасига олиб боришдан қўрқишларини таъкидлаган.
Изоҳ (0)