2023 йилнинг 24 октябрида машҳур хонанда Бритни Спирснинг ўтган йиллари ҳақидаги мемуар китоби нашрдан чиқди. Унда сўнгги 20 йилда нималар бўлгани ҳақида батафсил ёзилган. Маълум бўлишича, оламшумул машҳурлик ёш хонандага оғирлик қилган ва у бунинг бадалини ҳалигача тўлаб келмоқда.
Бритни Спирс 2000 йилларнинг бошларида энг машҳур қўшиқчилардан бири эди. Дастлаб у ҳаётини саҳна билан боғлашни орзу қилмаган. Бироқ продюсерлар қиздаги потенциални кўриб, уни “Микки Маус клуби” шоусига таклиф қилишади. Бритнининг карьераси 16 ёшиданоқ ривожлана бошлади. Ўша пайтларда хонанда ҳозиргача севимли бўлган Baby One More Time трекини чиқаради.
Хонанданинг машҳурлиги кундан кунга орта бошлайди. Аммо ҳар доимгидек қанчалик баланд кўтарилсанг, тушиш шунчалик оғриқли бўлади. Тез орада Бритни муаммоларга дуч кела бошлади. Ёш хонанда бунчалик катта шон-шуҳратга дош бера олмайди ва бу ҳолат отасининг аралашишига сабаб бўлади. 2008 йилдан 2021 йилгача у отасининг қарамоғида яшайди — бу юлдуз учун жуда қийин давр эди.
Ҳозирда хонанда бошидан кечирган даҳшатли кунлардан қутулишга ҳаракат қилмоқда. Мухлисларга аслида нима бўлганини айтиб бериш учун Spirs The Woman In Me (“Мендаги аёл”) деб номланган хотира китобини нашрдан чиқарди. Мазкур китоб биринчи куниёқ машҳурлар ҳақидаги энг кўп сотилган китобга айланди. Бритнининг бу китоби нима ҳақида?
Спирс яхши қиз бўлганидан афсусланади
Бритни Baby One More Time трекига клип ишлаганида ҳамма эътиборини унга қаратди. Ҳозирда ҳам уни поп маданиятидаги энг машҳур клиплардан бири деб аташ мумкин. Аммо ўшанда қўшиқчи мактаб ўқувчисининг жуда очиқ образи учун танқид қилинган.
Ёш юлдуз барчанинг эътибор марказида эди, баъзида бу унга ёқмасди ҳам. Қиз доимий равишда папарацсилар томонидан таъқиб қилинади. Бритни учун яна бир муаммо интервью бериш бўлиб, бошловчилар кўпинча унга нотўғри ва ҳатто ҳақоратли саволлар беришарди. Бироқ ўша пайтда бутунлай бошқача вазият эди. Спирс доимо ўзини чегаралар ичида ушлаб туриши, самимий ва дўстона бўлиши, журналистларга ҳурмат билан мурожаат қилиши — яхши қиз образини сақлаб қолиш учун ҳаракат қилиши керак эди.
“Ўша вақтни эслаганимда ҳақиқатан ҳам орзулар ичида яшаганимни, уни амалга оширганимни тушунаман. Гастрол сафарлари сабаб бутун дунё бўйлаб саёҳат қилдим”, — деб ёзган Спирс. Бироқ у стереотипларга амал қилиш учун беҳуда ҳаракат қилганини тан олади: “Ўшанда кучим бор эди. Афсуски, ундан етарлича фойдаланмаганман, мен исёнчи эмасдим”.
Жастин Тимберлейк билан муносабатлари
Бритни Спирс болалигидан таниш бўлган Жастин Тимберлейкни бутун вужуди билан севиб қолганини яширмайди. Машҳурлар 1999 йилдан 2002 йилгача бирга бўлишади, уларнинг биргаликдаги чиқишлари ҳақиқий шов-шувга айланади. Аммо ёпиқ эшиклар ортида содир бўлган воқеалар ОАВ ёзган эртакка умуман ўхшамасди.
Тимберлейк ўзининг яккахон карьерасини эндигина бошлаган ва кўп вақтини бола тарбиясига сарфлашини хоҳламасди. Шунинг учун у Бритнини аборт қилишга ундайди.
“Мен Жастинни жуда яхши кўрардим. Доим бир кун келиб оиламиз бўлади деб ўйлардим. Бу мен кутганимдан анча тез содир бўлди... Аборт қилиш тўғри қарорми, билмайман. Агар ўзимга қолса, буни ҳеч қачон қилмасдим. Аммо у ота бўлишни хоҳламаслигига шунчалик амин эдики”, — деб ёзган Спирс.
Шунингдек, хонанда йигитининг унга хиёнат қилганини ҳам айтиб ўтади. Бироқ у Жастинга шунчалик қаттиқ боғлангандики, ҳатто унинг бу қилмишини ҳам кечиради.
Жуфтликнинг ажралиши кутилмаганда содир бўлади: Спирс шунчаки иккита сўздан иборат SMS хабар олади: “Ҳаммаси тугади”. Унинг учун ажралиш яна бир синовга айланади, чунки Жастин бу вазиятдан максимал даражада фойдаланиш учун қўлидан келганини қилади — у машҳур Cry Me A River клипини чиқаради, унда собиқ севгилисини барча муаммоларнинг айбдори сифатида кўрсатади. Ва ҳамма йигитнинг хиёнати ҳақида билишига қарамай, барчасига Спирсни айбдор деб топади. “Мен Луизианада беҳуш ҳолатда эдим, у эса Голливуд бўйлаб хурсанд ҳолда югурарди”, — деб эслайди Бритни.
Хонанда 2007 йилда сочини қириб ташлаганининг сабабини айтди
Спирс бир неча бор реабилитация марказида даволанган. Ўша пайтда унинг икки ўғли бор ва Кевин Федерлайн билан ажралиш жараёнини бошдан кечираётганди. Бритни болаларини фақат кўриши мумкин эди, лекин уларни тарбиялай олмасди.
Бунга норозилик сифатида у кескин ўзгаришлар қилишга қарор қилади: “Сочимни калга олдириш ва бошқача ҳаракат қилиш — менинг қарши курашиш усулим эди”. Натижада 2008 йилда суд қарори билан хонанда устидан васийлик белгиланади, бу Жейми Спирснинг отаси ва адвокатига унинг молиявий ҳамда шахсий ишларини тўлиқ назорат қилиш имконини беради.
Ўшандан бери Бритнига имижини ўзгартириш ва ўзи хоҳлаган ишни қилиш тақиқланган: “Сочларимни ўстириб, формага қайтишим керак эди. Бундан ташқари, эрта ётишим ва улар буюрган дориларни ичишим шарт эди”.
Бритни Спирснинг отаси қарамоғидаги 13 йили қандай ўтди?
Бритни Спирс отаси Жейми назорати остида бўлган ўша йилларда қанчалик қийин бўлганини ҳеч ким тасаввур қила олмайди. “Консерваторлик аёллигимдан маҳрум қилди, мени болага айлантирди”, — деб ёзади у.
“Баъзида ўзимни ҳеч кимга керак бўлмаган, тузоққа тушиб қолган катта ёшли аёл каби ҳис қилардим, — дейди қўшиқчи. — Буни тушунтириш қийин, мен қандай қилиб кичкина қизга айланиб қолдим, тушунмасдим — улар эркинлигимдан маҳрум қилишганди. Катталар каби ҳаракат қила олмасдим, чунки менга катталар каби муносабатда бўлишмади, шунинг учун мен орқага қайтдим ва болалардек яшай бошладим”, — деб тан олади Бритни.
Ота қизини тўлиқ назоратда ушларди: унинг пулига эгалик қиларди, қомати қандай бўлиши кераклигини уқтирарди, ошпазларга у рухсат берган овқатлардан бошқа нарса беришга қўймасди ва юлдузни доимо семиз деб атарди.
Қўшиқчи буларнинг ҳаммасига фақат бир шарт учунгина чидарди: “Фарзандларим билан бирга ухлаш эвазига мен эркинлигимдан айрилишга ҳам тайёр эдим”.
“Ўн уч йил ўтди ва ўзимни ўз соямдек ҳис қилдим. Оиламнинг мен нисбатан бундай йўл тутишларига лойиқ эмасдим”, — дейди Бритни.
Бритни Спирс хонандаликка қайтишни режалаштиряптими?
Бритни Спирс хотира китобини барча мухлисларини ташвишга солаётган саволга жавоб билан якунлайди. Юлдузнинг айтишича, мусиқа ва саҳнадаги жонли ижролар энди унга аввалгидек қувонч келтира олмайди.
Изоҳ (0)