Ёш сеҳргарлар мактаби ва у ердаги ўқувчиларнинг саргузаштлари ҳақидаги фильмни кўрмаган ёки у ҳақда эшитмаган инсонни топиш қийин. “Гарри Поттер” франшизаси болалар ва катталар бирдек мириқиб томоша қиладиган асарлардан биридир. Мазкур фантастик фильмни яратиш учун тасвирга олиш жамоаси жуда кўп тер тўккан. Бу сафарги ҳикоямиз франшизанинг биринчи қисмига оид қизиқарли фактлар ва суратлар ҳақида бўлади.
“Гарри Поттер ва ҳикматлар тоши”да профессор Дамблдор ролини ўйнаган Ричард Харрис анча кекса бўлган ва хотираси унга панд берган. У ўз сўзларини кўпинча эсидан чиқариб қўйган. Уни хафа қилмаслик учун Гарри Поттер қаҳрамони актёри Дэниэл Редклиф Ричарддан диалогларини машқ қилишда ёрдам беришини сўраган. Меҳрибон бола аслида доим нутқини ёддан билган, шунчаки кекса ҳамкасби сўзларини эслашга ва такрорлашга шу тарзда кўмаклашган.
Том Фелтон ижодий жамоадаги болалар орасидан энг катта ёшли бола эди. У Рупертдан бир ёш, Дэниэлдан икки ёш ва Эммадан уч ёш катта эди. Эммма Уоцон ўша вақтда Томни ёқтириб қолган, чунки Фелтон келишган, ақлли бола эди ва скейтбордда уча оларди. Аммо Том Эммага ўз синглисидек муносабатда бўлган. Ҳозирда улар яқин дўстдир.
“Гарри Поттер” асари бесцеллер китоблардан бўлганига қарамай, киностудия раҳбарлари фильмнинг муваффақиятсиз чиқишидан ва ёш актёрларнинг тезда улғайишидан қўрққан. Шу сабабли асар муаллифи Роулингга студия иккита таклиф киритган: асар асосида ёки бир нечта анимацион фильмлар ё барча китобларни бирлаштирган битта фильм суратга олинади. Аммо Роулинг буни ҳатто муҳокама қилишни истамади ва студияга унинг китобларидан бу тарзда фойдаланишни тақиқлади. Натижада “Гарри Поттер ва ҳикматлар тоши” фильмини суратга олиш келишилди.
Мириам Марголис биринчи марта фильмда Помона Спраут образини гавдалантирган. У кичик рол ўйнаганига қарамай, мухлислар актрисани ҳануз яхши эслайди ва баъзилар ҳатто уни тўй ва тадбирларга Помона образида келишини илтимос қилиб туради. Бундай таклифларга жавобан актриса Марголис салбий муносабат билдирган ва анча йиллар аввал улғайиб бўлган, лекин ҳали ҳам сеҳргарлар олами ҳақида унутмаган бундай Ёши катта мухлисларни камолотга етмаган инсонлар деб атаган. Шундан сўнг, Лаванда Браун ролини ўйнаган Жесси Кейв унга қарши чиққан ва барча инсонлар қалбан бола эканлигини, Мириам эса қариб қолгани учун нималар деганини тушунмаслигини айтиб ўтган.
Фильмдаги кутубхонанинг тақиқланган бўлими ҳақиқий Оксфорд кутубхонасида суратга олинган, китобларнинг баъзиларига эса юзлаб йилдан ошган. Қадимги китобларнинг иложи борича узоқ вақт хизмат қилишини таъминлаш учун Бодлеан кутубхонасида олов ёқиш қатъиян ман этилади. Аммо Гарри Поттер жамоаси учун бу қоида истисно қилинган. Дэниэл Редклифф қўлидаги шамчироқ билан мазкур қадимий кутубхона бўйлаб юрган ягона бола ва эҳтимол, ягона одамдир.
“Гарри Поттер” фильмларини тасвирга олиш майдонидан олинган фотосуратларда актриса Мегги Смитнинг деярли ҳеч қачон табассум қилмаганининг гувоҳи бўлишимиз мумкин. Бир қарашда, у ҳар доим қаттиққўл ўқитувчи қиёфасида қолгандек туюлади, лекин аслида Мегги Гарри Поттер ҳақидаги фильмда ишлашни унчалик ёқтирмасди. Биринчи иккита фильмнинг режиссёри Крис Коламбус Смитни суратга олиш учун соатлаб кутишга мажбур қилган ва унинг навбати келганида Дэниэл Редклиффни унинг ортидан жўнатиб юборган, чунки ғазаб отига минган аёл ёш болани урушмаслигини билган.
Йирик фильмларни суратга олиш низомига кўра, ёш бола актёрлар фильм учун мактабдаги ўқишни ташлаб қўймасликлари ва дарслар учун вақт ажратишлари шарт. Суратга олиш соатлари орасида уларга танаффус берилади ва болалар суратга олиш майдонида махсус ўқитувчилардан сабоқ олади. Хогварцнинг асосий залида ўтирган ёш актёрлар ўзларини ниманидир ўқиётгандек кўрсатмаган, балки ҳақиқатда таълим олган.
Гарри Поттер образини ижро этиш учун актёрни топиш бутун кастинг жараёнининг энг қийин қисми бўлган. Бошқа роллар учун деярли барча актёрлар аллақачон танланган вақтда Гаррига даъвогарлик қиладиган бола топилмаган. Сўнг Дэниэл ёш Девид ролини ўйнаган “Девид Копперфилд” фильмини тасодифан томоша қилганида режиссёр Крис Колумб шу заҳотиёқ ўзларига керак бўлган актёр ким эканлигини англаб етган. Аввалига Редклиффнинг ота-онаси бунга рози бўлмаган, уларни кўндиришга режиссёр узоқ вақт уринган ва охир-оқибат масала ижобий ҳал қилинган.
Франшизани суратга олиш Голливудда ўтказилиши режалаштирилган эди. Аммо Дэниэлнинг ота-онаси ўғлини бошқа давлатга қўйиб юбормаганлиги ва деярли фақат инглизлардан иборат актёрларнинг транспорт харажатларини камайтириш учун суратга олиш ишлари Англияга кўчирилган.
Кентербери собори, Глостер собори, Бодлиан кутубхонаси, Лондон ҳайвонот боғи, Кингс Кросс станцияси ва бошқа кўплаб жойларнинг барчаси “Гарри Поттер”даги ажойиб муҳитни яратишга ўз ҳиссасини қўшган.
Гарри Поттернинг онаси Лили “Ҳикматлар тоши” қисмида бир неча дақиқага пайдо бўлади. Аввал ушбу рол муаллиф Жоан Роулингга таклиф қилинди, лекин у актёрлик маҳоратининг етишмаслиги билан барча ишни барбод қилишини таъкидлаб, таклифни рад этди. Қолаверса, Лили образи фильмда кўплаб воқеаларни очиб беришга хизмат қиладиган марказий қаҳрамонлардан бири эди.
Хогварц мактабидаги катта зал дастлаб бошқача кўринишда бўлган. Дизайнер Стюарт Крейг полларни ёрк тоши билан қоплаш учун жуда кўп пул сарфлаган. Бу иши учун дизайнер ва режиссёрни кўпчилик танқид қилган, лекин охир-оқибат у барчасини тўғри қилгани маълум бўлди. Франшизанинг барча қисми айнан шу ерда суратга олинди ва бино узоқ вақтга хизмат қилди.
Изоҳ (0)