Самарқандда эркак шаръий никоҳдаги аёли билан ўртасида содир бўлган жанжал оқибатида 1 ёшли ўғлини ўлдириб қўйди. Бу ҳақда «Ёшлар» телеканалининг «Янги давр» информацион дастурида маълум қилинди.
Маълум бўлишича, эр-хотин Самарқанд шаҳридаги Гўрўғли кўчасида жойлашган уйларнинг бирида ижарада яшаб келган. Қотиллик содир этилган куни эркак ва аёл ўртасида ўзаро жанжал келиб чиққан. Аёл эрининг айтганини қилмагани учун эркак унинг қўлидаги болани олиб, боши билан икки-уч марта ерга урган.
Бола воқеа жойида вафот этган. Эркак эса жиноят жойидан қочиб кетган.
Ҳолат бўйича ўтказилган суд мажлисида айбланувчи ўзига қўйилган айбга иқрор бўлмаган. Суд иш ҳужжатларини ўрганган, гувоҳлар ва томонларнинг кўрсатмаларини тинглаб, ҳукм чиқарган.
Судланувчи Жиноят кодексининг 97-моддаси (қасддан одам ўлдириш) 2-қисми «в, ж» бандларида кўрсатилган жиноятни содир этганликда айбдор деб топилган ва унга 18 йил муддатга озодликдан маҳрум этиш жазоси тайинланган.
Аввалроқ Тошкентда 20 ёшли ўғлини ўлдириб, уни ертўлага кўмиб қўйган эркакка суд ҳукми ўқилгани, Қашқадарёда маст ота ўғлини темир бўлаги билан уриб, ўлдириб қўйгани тўғрисида хабар берилганди.
Изоҳ (0)