Тошкент—Москва поездидан топилган катта миқдордаги героин: айбига иқрор темирйўл хизматчиси билан суҳбат (видео)

“Надомат” лойиҳасининг навбатдаги суҳбатдоши Санжар Каримхўжаев айни дамда пойтахтдаги 51-сонли манзил колониясида жазо муддатини ўтаяпти. У ўзи билмаган ҳолда оғир жиноятга қўл урган ва бунинг товонини узоқ йиллардан бери оиласидан узоқда, тўрт девор орасида ўтказиб тўламоқда.

Маҳкум Санжар Каримхўжаев 1966 йили Тошкент шаҳрида туғилган. Оилали, уч фарзанд ва олти набиранинг бобоси. У жиноят кодексининг 273-моддаси билан айбдор деб топилиб, 20 йилга озодликка маҳрум этилган. Жазо муддатининг бир қисмини “борса-келмас” дея таърифланган Жаслиқ қамоқхонасида ўтаган.

— 2010 йили Ўзбекистон темирйўл акциядорлик жамиятида вагон хизматчиси бўлиб ишлардим. Мен Марказий Осиё ва Россия Федерациясига қатнайдиган поездларда юкларни жойлардим. 2010 йили ўзим билмаган ҳолда, катта хатога йўл қўйдим. 14 йилдан бери оиламдан узоқда, жамиятга ҳеч қандай фойдам тегмай умримни ўтказяпман.

Ҳамкасбларимдан бири ёнимга келиб “Санжар ака, озгина ҳужжатсиз юк бор, ўшаларни вагон плафонига жойлаш керак”, деган. Ҳақиқатан ҳам ўша ерга юк беркитилса бўларди, аммо “У айнан қандай юк? Нега ҳужжатлари йўқ”, деб сўраганимда “Тиллага қўшиладиган қандайдир модда, хавотир олманг ўзим жавоб бераман”, деган. Унинг гапига ишониб, юкларни жойлаб берганман. Бу юк Ўзбекистон, Қозоғистон ва Россия чегарасидан олиб ўтилган ва ҳеч қаерда текширилмаган.

Мен кўп марта у қандай юк эканлигини билишга қизиққанман. Ҳамкасбим ҳеч нарса айтмаган. Такрор шу жиноятни содир этишганида, қўлга тушишган ва ғалвир сувдан кўтарилган.

Вагон плафонига яширилган юклар катта миқдордаги героин моддаси бўлган. Яширмайман, ортиқча юкни расмийлаштирмаслик учун бир-икки сўм пул олардик, аммо бу юкдан фалон сўм берамиз деган келишув бўлмаган. Мен ҳамкасбимнинг “Бу ёмон нарса эмас, беш вақт намоз ўқийман. Сизни алдамайман-ку”, деган гапига ишонганман.

14 йилдан бери жазо муддатимни ўтаётган бўлсам ҳамиша ўзимни айбдор ҳис қиламан. Қонунларни билмаслигим, ишонувчанлигим ва эътиборсизлигимнинг тўловини шунча йилдан бери тўлаяпман.

Терговчи ишни ўрганиш давомида телефонимда жиноий гуруҳ аъзолари билан сўзлашганимни топмади. Бу иш бўйича 19 киши судланган бўлса, улар орасида фақат ҳамкасбимни танийман, холос.

Судья “Нега Санжар Каримхўжаевни ҳам бу ишга тортдингиз? У ҳам жиноий гуруҳ аъзоси сифатида жазоланишини билармидингиз?”, деб савол берганида ҳамкасбим “Катта қарзим бор эди, уни тўлаш учун шундай қилдим”, деб жавоб берди. Майли, у ҳам 20 йилга озодликдан маҳрум этилди, аммо у дунёда ҳам ўзига тегишли жазони олади.

Ҳали суд ҳукми ўқилмасидан аввал раҳбарнинг айтган гапи, кўнглимга қаттиқ таъсир этди. “Агар юклар ичида героин эмас, портловчи модда бўлганида нима қилардингиз? Текширмай вагонга жойлаган буюмларингиз қанчадан-қанча инсонлар ҳаётига зомин бўлиши ҳақида ўйлаб кўрдингизми?” деди. Ана шу гапнинг ўзидаёқ тегишли хулосани чиқаргандим.

Суддан тўғри, Жаслиқдаги қамоқхонага жўнатишган. Жазо муддатининг 7 йилини ўша ерда ўтказдим. Ўшанда 44 ёшда эдим, ҳозир 58 ёшдаман. Фарзандларим улғайди, аёлим икки қизимни турмушга берди. Энг алам қилгани, ота бўлиб қизларимга оқ фотиҳа беролмадим. Олтита набирамнинг улғайишини кўролмадим.

Аёлимдан ҳамиша миннатдорман, жазони қайси ҳудудда ўтасам ҳам кўргани борди. Фарзандларимга яхши тарбия бериб, тўйлар қилди. Нафақат халқим, балки оилам олдида ҳам ўзимни айбдор деб ҳисоблайман. Ҳали жазо муддатим тугагани йўқ, ўғлим “Сиз озодликка чиққанингиздан кейин уйланаман”, деб оёқ тираб туриб олган. Ҳаётимнинг шунча йили бесамар ўтганидан ва жамиятга нафим тегмаганидан афсусланаман, дейди маҳкум Санжар Каримхўжаев.

Видеони тўлиқ ҳолда қуйида томоша қилинг.

Лойиҳа муаллифи: Наргиза Муродова