Германия Чеченистон раҳбари Рамзан Қодировнинг танқидчиси ва чеченистонлик мухолифатчи блогер Тумсо Абдураҳмоновнинг укаси Муҳаммад Абдураҳмоновга сиёсий бошпана берди. Бу ҳақда Муҳаммаднинг ўзи маълум қилди.
Германияда Муҳаммад Абдураҳмоновга суиқасд уюштирилган эди. 2023 йил август ойи охирида Мюнхендаги суд Валид Дадақоев исмли шахсни суиқасдда айбдор деб топиб, 10 йилга озодликдан маҳрум қилди. Судга раислик қилган судья Кристоф Виснернинг айтишича, қотиллик Чеченистон раҳбари Рамзан Қодировнинг “хабардорлиги, розилиги ва манфаатлари”дан келиб чиққан ҳолда тайёрланган.
Муҳаммад Абдураҳмоновнинг Германиядан бошпана сўраши
Муҳаммад Абдураҳмонов ҳам акаси Тумсо сингари 2015 йилда Чеченистон ҳудудини тарк этишга мажбур бўлган. У бир неча йил Германиядан бошпана олиш учун курашди. Талаб икки марта рад этилган.
2021 йилдагина Миграция ва қочқинлар бўйича федерал идора (БАМФ) суд қарори билан Муҳаммад Абдураҳмонов ва унинг оиласининг бошпана сўраб берган такрорий аризасини қайта кўриб чиқишни бошлади. Аммо унга суиқасд уюштириш режалари аниқланиб, жиноий иш очилганидан сўнг, қарор ҳукм эълон қилинмагунча қолдирилди.
Изоҳ (0)