“Дарё”да “Сирдарёдаги ‘роддом’дан ҳам чақалоқ ўлиги чиқди” сарлавҳали мақола эълон қилинганди. Сирдарё вилоят соғлиқни сақлаш бошқармаси ҳолатга муносабат билдириб, “роддом”дан ўлик чиққанини тасдиқлади.
Айтилишича, ҳолат бошқарма масъуллари томонидан тўлиқ ўрганилган.
Сирдарё шаҳрининг “Адолат” маҳалласида истиқомат қилаётган Д.М.нинг бешинчи ҳомиласи “учинчи туғуруқ 11 ноябрь куни муддатидан олдин 34-ҳафтасида РДС, туғма зотилжам, оғир кечиши, ўткир нафас етишмовчилиги” ташхиси билан туғилган. Шунинг учун ҳам чақалоққа 17 ноябрга қадар шифокорлар назорати остида реанимация бўлимида ёрдам кўрсатилган. Чақалоқнинг аҳволи бир оз яхшилангач, 18 ноябрь куни онасига берилиб, реанимация бўлимидан палатага ўтказилган. 19 ноябрь куни эса бола тўсатдан кўкариб кетгач, чақалоқнинг онаси ҳамширани чақирган. Унга шифокорлар томонидан шошилинч реанимация ёрдам кўрсатилиши лозим бўлганда чақалоқ ўлган бўлган, дейилади бошқарма эълон қилган маълумотда.
Таъкидланишича, мазкур масала юзасидан ҳуқуқ-тартибот идораларига, тегишли соҳа ходимларига ўша вақтнинг ўзида шифокорлар томонидан хабар берилиб, чақалоқ экспертизадан ўтказилган.
Махсус суд тиббий экспертизаси томонидан чақалоқ ўлимига укол эмас, аспирацион синдром сабаб бўлгани тўғрисида хулоса берилган. Айни кунда ушбу масала юзасидан суриштирув ишлари олиб борилмоқда, дейди масъуллар.
Аввалроқ Бўкадаги “роддом”дан икки ўлик чиққани, она ва унинг эндигина туғилган қизалоғи шифокорлар қўлида жон бергани ҳақида хабар берилганди.
Изоҳ (0)