Хитойда аёл 11 яшар қизни 27 ёшли ўғлига “идеал” рафиқа қилиб тарбиялаш мақсадида ўғирлаб кетди. Бу ҳақда South China Morning Post хабар берди.
Ўғрилик Гуйчжоу провинцияси Люпаньшуй округидаги қишлоқлардан бирида содир бўлган. Аёл жабрланувчига идеал келин сифатида қараган ва унинг отасига бу борада мурожаат қилган. Бироқ таклиф рад этилгач, қиз уйда ёлғиз қолганида аёл уни ўғирлаб кетган.
Воқеа 2023 йилда содир бўлган, аммо оммага энди эълон қилинмоқда. Ўғриликдан сўнг аёл ҳибсга олинган, бир неча кундан кейин унинг ўғли ҳам полицияга таслим бўлган. Қиз тўрт кун бировнинг уйида яшаган. 15 декабрь куни суд аёл ва ўғлини бола ўғирлаганликда айблаб, икки йил-у етти ойга озодликдан маҳрум қилган.
Бу ҳолат интернетда баҳс-мунозараларга сабаб бўлган. Ижтимоий тармоқ фойдаланувчилари жазонинг “юмшоқлиги” ва бундай никоҳга киришнинг маънавий оқибатларидан ғазабланган.
Хитойда ота-оналар ўсмир қизларни асраб олиб, уларни ўғилларига бўлажак хотин қилиб тарбиялаш анъанаси бўлган, деб ёзади South China Morning Post.
1950 йилларда бундай урф-одатлар тақиқланган, аммо қишлоқ жойларда уларга риоя қилиш давом этмоқда. Мисол учун, Хитойнинг жануби-ғарбий қисмида 1990 йилда туғилган қиз ўғирлаб кетилиб, кейин беш ёшида 2,5 минг юанга (4 миллион 300 сўмдан зиёд) сотилган. Харидор мамлакат шимолидан келган эркак бўлган.
2023 йилда уни ўғирлаб сотган эркак судланиб, ўлимга ҳукм қилинган. Global Times нашрининг ёзишича, жабрланувчи бутун умри давомида уйига қайтиш умидида яшаган. 2021 йилда у қариндошларини топишга муваффақ бўлган.
Изоҳ (0)