АҚШда 71 ёшли эркак 48 йиллик қамоқдан сўнг суд томонидан оқланди

Оклаҳома судьяси қотилликда айбланиб, 48 йил қамоқда ўтирган 71 ёшли Глинн Симмонсни озод қилди. Бу ҳақда Associated Press агентлиги маълум қилмоқда.

“Суд аниқ ва ишончли далилларга асосланиб, жаноб Симмонсга қўйилган айбловни бекор қилди, у жиноят содир этмагани аниқланди”, - дея судья Эми Палумбо сўзларидан иқтибос келтиради агентлик.

Глинн Симмонс 1975 йилда қотиллик жиноятида айбланиб, ўлимга ҳукм қилинганди. 1977 йилда ўлим жазоси умрбод қамоқ жазосига алмаштирилди.

Симмонс 48 йил 1 ой ва 18 кунни қамоқда ўтказди, бу АҚШ тарихидаги адолатсизлик қурбони учун энг узун қамоқ жазоси ҳисобланади, дея қайд этади AP.

Эндиликда Симмонс давлатдан 175 минг доллар миқдорида компенсация талаб қилишга ҳақли.