Қашқадарё вилоятининг Яккабоғ туманида яшовчи 30 ёшли Жамшид Хушбоқов пичоқлаб ўлдирилди. Марҳумнинг яқинлари уни бир неча киши ўлдирган, деган гумонда. Туман прокуратураси эса мазкур жиноятда бир нафар шахсни айблаган ва қамоққа олган.
«2019 йил 27 сентябрь куни соат тахминан 17:00 да эримнинг телефони жиринглади. Телефонга жавоб берган турмуш ўртоғим: ‘Қаерга чиқишим керак? Хўп, боғчанинг олдига чиқаман унда’, дея телефонини ўчирди. Кейин намоз ўқиётган пайтида дарвозамиз олдига машина келиб тўхтади ва сигнал чалди. Эрим чиқавермагач, дарвозамиз жудаям қаттиқ тақиллади. Шунчалик ваҳимали эдики, бузиб юборгудек эди. Шунда қайнонам: ‘Эшикка қара-чи, ким экан?’ деди. Дарвоза томон юрдим, аммо очишга улгурмадим. Эшик очилиб, ҳовлиққан, кўзлари аланг-жаланг, ваҳимали кўринишдаги бола: ‘Жамми акам чиқяптими?’ деди. Кейин кўрсам, ўша боланинг ранги сариқ экан. Бироқ ўша куни қўрқувданми ёки бошқа сабабми унинг ранги қорайиб, куйиккан рангда эди», — дейди ўша кунги воқеа ҳақида гапирган марҳумнинг хотини Азиза Турсиналиева.
«Дарё» мухбири билан суҳбатлашган марҳумнинг яқинлари унинг ўлимида бир неча кишининг қўли борлигини айтмоқда.
«Туман прокуратураси эримнинг ўлимида бир кишини айблаяпти. Ва судга ҳам шундай маълумот берилган. Ҳолбуки ўша куни эримни уч киши олиб кетганди. Мен эримни олиб кетиш учун келганларнинг машинасини кўргандим. Эримни чақириш учун дарвозадан қараган кишидан ташқари машинада яна икки киши бор эди», — дейди Азиза Турсиналиева.
Марҳумнинг хотини эрини олиб кетганларни кўрган ягона гувоҳ у бўлса-да, прокуратура тергов давомида уни умуман эшитмаганини, шу боисдан ҳам прокуратуранинг терговига ишонмаслигини, ўша тергов хулосаси асосида ўтаётган суд ҳам адолатсизлик қилаётганини таъкидламоқда.
«Эримни олиб кетганлар уч кишилигини, унинг ўлимида Ш.С.дан ташқари яна икки кишининг қўли борлигини айтиш учун туман прокуратураси ҳамда вилоят прокуратурасига бир неча маротаба бордим. Аммо мени эшитишни исташмади. Энди судда ҳам бу гапларим инобатга олинмаяпти», — дейди марҳумнинг турмуш ўртоғи.
Азиза Турсиналиеванинг таъкидлашича, эри кеч соат 17:00 да уч нафар шахс билан чиқиб кетгач, соат 19:00 да эрининг телефон рақамидан қайнонасига қўнғироқ бўлган ва унинг шифохонада эканлиги айтилган.
«Ўша куни тахминан соат 19:00 да эримнинг телефон рақамидан қайнонамга қўнғироқ бўлди ва эримнинг шифохонада оғир аҳволдалиги хабар қилинди», — дейди марҳумнинг хотини.
Хабар берилишича, марҳумнинг яқинлари шифохонага борганда Жамшид Хушбоқов комада бўлган.
«Ўша куни менга Жамшид ўғлимнинг телефонидан қўнғироқ бўлди. Жавоб берсам, ўғлим эмас, бошқа одам экан. Ўғлимни шифохонада, аҳволи оғир дейишди. Етиб борсак, ўғлим кома ҳолатида экан. Аммо 29 сентябрь куни вафот этди. Ўша кундан бери адолат излайман, аммо на прокуратура, на суд адолатли иш қилди. Ҳаммаси адолатсизлик қилмоқда», — дейди марҳум Жамшид Хушбоқовнинг онаси Сабоҳат Муқимова.
Мазкур жиноят иши судга ўтказилган бўлиб, бир нечта туман судларида кўриб чиқилган ва айни кунда Ғузор туман судида кўриб чиқилмоқда.
Жабрланувчиларнинг адвокати Ўктам Худойбердиев ҳамда Ойбек Раҳимовларнинг маълумот беришича, тергов жараёни тажрибасиз ходим томонидан олиб борилганлиги сабабли кўплаб саволлар очиқ қолган.
«Мазкур жиноят иши бир гуруҳ шахслар томонидан амалга оширилган бўлиши ёки бу тахмин инкор этилиши мумкин. Бироқ тергов жараёнида тажрибасизликка йўл қўйилгани боис мазкур савол жавобсиз қолган. Суд ҳам тергов жараёнида аниқланган ҳолатлар бўйича судланувчи, жабрланувчи ва гувоҳлар фикрини эшитиш билан кифояланмоқда. Биз жиноят ишини ойдинлаштириш учун илтимосномалар киритяпмиз. Бироқ барча илтимосномаларимиз рад этилмоқда», — дейди адвокат Ойбек Раҳимов.
Ойбек Раҳимовнинг маълумот беришича, судланувчи Ш.С. терговдаги кўрсатмасида марҳум уни ип билан бўғгани сабаб жон талвасасида унга пичоқ санчганини билдирган.
«Судланувчи Ш.С. марҳум машинанинг орқа ўриндиғида ўтириб, унинг бўйнидан ип билан бўғгани учун унга пичоқ санчганини билдирган. Аммо терговда воқеа жойи кўздан кечирилган, аммо ўша ип қаердалиги сўралмаган ва топилмаган. Бутун бошли гуруҳ тополмаган ипни эса кейинчалик судланувчининг адвокати терговчига тақдим қилган. Бу жудаям шубҳалимасми?», — дейди адвокат Ойбек Раҳимов.
Ўша куни воқеани кузатиб турган гувоҳ воқеа жойидаги ошхона ишчиси Байрам Умрзоқов воқеа ҳақида шундай дейди.
«Nexia-3’да икки киши келиб тўхтади. Машинадан тушмасдан, роса уришиб, сўкишишди. Сўнг рулда ўтирган киши машина эшигини очиб, оёғини ерга қўйди. Аммо машинадан тушмади. Шунда жанжал кучайди, шекилли, машина рулида ўтирган киши олд ўриндиқда ўтирган шеригига пичоқ урди. Кейин машинадан тушиб, бошини чангаллаб турди. Бироз ўтиб эса пичоқдан яраланган шеригини судраб машинада туширди-да, машинага қаттиқ газ бериб, воқеа жойидан кетди».
Жабрланувчининг ҳимоячиси Ойбек Раҳимов марҳум ва судланувчи телефон орқали мулоқот қилганда тортишганини, шунда учинчи шахснинг овози эшитилиб қолганини, бироқ бунга тергов ҳам, суд ҳам эътибор қаратмаётганини айтмоқда.
«Судга тақдим қилинган шу овоз стенограмма қилинмаган ва суднинг эътиборидан четда қолмоқда. Буни ўз вақтида тергов ҳам эътиборсиз қолдирган. Тергов жараёнида телефон қўнғироқлари ва рақамлар аниқлаштирилиб, бу овоз кимникилигига аниқлик киритилиши лозим эди. Жабрланувчилар эса бунга эътибор қаратилишини сўраб, бир неча мурожаат қилишган. Бироқ бу мурожаатлар эътиборсиз қолдирилмоқда», — дейди жабрланувчиларнинг адвокати.
Жабрланувчиларнинг яна бир адвокати Ўктам Худойбердиевнинг маълумот беришича, жиноят иши бир неча шахслар томонидан содир этилган бўлиши мумкинлиги тўғрисидаги гумон суд тиббий экспертизасининг ўз хулосасини ўзгартиришга уриниши сабаб янада кучайган.
«Суд тиббий экспертизанинг дастлабки хулосасида марҳумнинг бир нечта қовурғаси сингани айтилган. Кейинчалик эса бу хулоса ўзгартирилиб, эксперт адашган деган гап айтилди. Бу эса биздаги гумоннинг кучайишига сабаб бўлди. Шунингдек, судга воқеа жойида ошхона ва тўйхона борлиги сабаб воқеа кузатув камерасига олинган бўлиши мумкинлигини айтиб, буни аниқлаштириш ҳақида илтимоснома киритдик. Бироқ суд яна рад этди», — дейди Ўктам Худойбердиев.
Суд тиббий экспертизаси ўз хулосасини ўзгартирганини марҳумнинг онаси ҳам таъкидламоқда.
«Суд тиббий экспертизаси хулосасини шахсан ўзим ўқиб чиққанман. Тиббиёт ходими бўлганим учун дастлабки хулоса ўзгарганини дарҳол сезганман. 2019 йил 29 сентябрдаги суд тиббий экспертизасининг дастлабки хулосасида бош мия шикастланиши, чап елка гематомаси, орқадан қаттиқ жисм билан урилган деган жойлари бор эди. Шунингдек, ўғлимнинг ўнг томонидаги 3, 4, 5-қовурғалар, чап тарафидаги 5, 6, 7-қовурғалар сингани ёзилганди. Ўзгартирилган хулосада эса техник хато сабаб қовурғалар сингани хато ёзилгани айтилган. Бу очиқчасига жиноятни яшириш-ку», — дейди марҳумнинг онаси.
Жамшид Хушбоқов ўлими билан боғлиқ жиноят ишини прокуратура етарли даражада ўрганмаган, дея хулоса қилган марҳумнинг яқинлари ижтимоий тармоқлар орқали бир неча маротаба чиқиш қилган.
Мазкур чиқишларга жавоб берган Қашқадарё вилоят прокуратураси қотиллик воқеаси 2019 йил 27 сентябрь куни соат 18:00 ларда Яккабоғ туманининг Алақарға қишлоғида жойлашган «Бахтиёров Шамшод Шерзод ўғли» хусусий корхонасига қарашли ошхона рўпарасида содир бўлганини маълум қилган ва бу иш бўйича Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш) ва 97-моддасининг 1-қисми (қасддан одам ўлдириш) билан жиноят иши қўзғатилганини ёзган.
Прокуратура, шунингдек, жиноят иши бўйича гумонланувчи Ш.С.га айблов эълон қилиниб, қамоқ эҳтиёт чораси қўлланганини, жиноят иши 2019 йил 31 декабрь куни айблов хулосаси билан Жиноят ишлари бўйича Чироқчи туман судига юборилганини билдирган.
Кези келганда таъкидлаш лозимки, мазкур жиноят ишини кўриб чиқаётган Жиноят ишлари бўйича Ғузор туман суди иш очиқ суд мажлисида кўриб чиқилаётган бўлишига қарамасдан, воқеалар ривожини ўрганмоқчи бўлган «Дарё» мухбирининг суд мажлисида иштирок этишига рухсат бермади. Журналистнинг ахборот олишига тўсқинлик қилган судья Нурбек Абдуллаев ҳаракатини карантин тартибига амал қилаётгани билан изоҳлади.
«Суд жараёнига бир нафар ОАВ ходимига рухсат берамиз, шу боис судга блогер киритилиб, «Дарё» мухбири иштирок этишига рухсат берилмайди» деган судья. Мухбирнинг «Агар телевидение ходимлари келишса, унда мухбирни киритиб операторга рухсат бермайсизми ёки операторни суд залига қўйиб, мухбирнинг киришига тўсқинлик қиласизми?» деган саволига жавоб бермади. Тўғрироғи, жавоб беришни истамади.
Жиноят ишлари бўйича Ғузор туман суди раиси Нурбек Абдуллаев журналистнинг ахборот олишига тўсқинлик қилиб, арзимас сабабни важ қилиб кўрсатишда давом этмаса, «Дарё» воқеалар ривожини кузатиб боради.
Изоҳ (0)