2018 йил декабрь ойида содир бўлган жинсий зўравонликка оид фуқаролик иши бўйича Дубльин Олий суди UFC’нинг ярим енгил (66 кг гача) ва енгил (70 кг гача) вазн тоифаларида собиқ чемпионлик камарига эга бўлган ирландиялик Конор Макгрегорни айбдор деб топди. Бу ҳақда Daily Mail нашри хабар берди.
Маънавий зарар учун спортчи жабрланувчига тахминан 250 минг евро товон пули тўлаши керак бўлади.
Эслатиб ўтамиз, Макгрегор 2018 йил декабрь ойида ўзининг дўсти Жеймс Лоуренс билан бирга Дубльин шаҳрида таниши Никита Ни Лаймхинга нисбатан жинсий зўравонлик қилганликда айбланган эди. Суд жараёнида у ўша куни гиёҳванд моддалар истеъмол қилганини ҳам тан олди.
Конор Макгрегор 1988 йил 14 июлда Ирландиянинг Дубльин шаҳрида туғилган. У аралаш яккакураш тарихидаги энг машҳур жангчилардан бири саналади. Макгрегор UFC’да бир вақтнинг ўзида икки вазн тоифасида – ярим енгил (66 кг) ва енгил (70 кг) чемпионлик камарига эга бўлган илк жангчи ҳисобланади.
Унинг спортдаги муваффақиятлари уни жаҳоннинг энг бой спортчиларидан бирига айлантирди. Шу билан бирга, Макгрегор шахсий ҳаётидаги можаролар ва ҳуқуқий муаммолари билан ҳам тез-тез янгиликлар марказида бўлиб келади.
Изоҳ (0)