Жиззах вилоятининг Дўстлик туманида назоратсиз қолган боғча тарбияланувчиси вафот этганди. Бунга сабабчи бўлганларга нисбатан суд ҳукми ўқилди. Бу ҳақда “Севимли” телеканалининг “Замон” информацион дастурида маълум қилинди.
2024 йилнинг 15 февралида Дўстлик туманида жойлашган оилавий нодавлат мактабгача таълим ташкилоти тарбияланувчилари назоратсиз қолдирилиши оқибатида, уч нафар бола мактабгача таълим ташкилоти ҳовлисидан чиқиб кетганди.
Шу куни соат 2021 йилда туғилган қизча нодавлат мактабгача таълим ташкилотидан тахминан 1 километр узоқликдаги фермер хўжалиги дала майдонидан оқиб ўтувчи ариқдаги сув ичидан вафот этган ҳолда топилган ва ҳолат юзасидан жиноят иши қўзғатилганди.
Информацион дастурда хабар қилинишича, ушбу боғчага қатновчи 18 нафар бола рўйхатига 3 ёшли қизалоқ киритилмаган ҳолда қабул қилинган ва шу куни тарбиячилар эътиборидан четда қолган қизча икки нафар дугонаси билан ўзлари билмаган ҳолда боғчадан чиқиб кетган.
“Газета.uz”нинг ёзишича, жиноят ишида жами уч киши — 31 ёшли боғча директори Ф.М., 31 ёшли тарбиячи Д.Т. ва 49 ёшли туман Санитария-эпидемиологик осойишталик ва жамоат саломатлиги бошқармаси бошлиғи А.Ў. айбланган.
Суд ҳукмига кўра:
Директор Ф.М. Жиноят кодексининг 116-моддаси 3-қисми (касб юзасидан ўз вазифаларини лозим даражада бажармаслик одам ўлимига сабаб бўлса) ва 167-моддаси 2-қисми “г” бандида (мансаб мавқейини суиистеъмол қилиш йўли билан ўзлаштириш ёки растрата йўли билан талон-торож қилиш) назарда тутилган жиноятларни содир этганликда айбдор деб топилиб, 3 йилга мактабгача ва мактаб таълими соҳасида ишлаш ҳуқуқидан маҳрум этиш ва 4 йил 1 ойга озодликни чеклаш жазоси тайинланди;
Тарбиячи Д.Т. Жиноят кодексининг 116-моддаси 3-қисмида назарда тутилган жиноятларни содир этганликда айбдор деб топилиб, унга 3 йилга мактабгача ва мактаб таълими соҳасида ишлаш ҳуқуқидан маҳрум этиш ва 4 йилга озодликни чеклаш жазоси тайинланди;
Бошқарма бошлиғи А.Ў. Жиноят кодексининг 205-моддаси 1-қисми (ҳокимият ёки мансаб ваколатини суиистеъмол қилиш) ва 209-моддаси 1-қисмида (мансаб сохтакорлиги) назарда тутилган жиноятларни содир этганликда айбдор деб топилди. Унга 1 йилга мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиш ва 1 йил 6 ойга озодликни чеклаш жазоси тайинланди.
Бундан бир неча йил аввал Қаршида боғчадан берухсат чиқиб кетган 4 ёшли болани поезд уриб кетганди. Фарғонада эса боғчадан ташқарига рухсатсиз чиққан 4 ёшли бола чўкиб кетиб, вафот этганди.
Изоҳ (0)