Ўзбекистонда 65 нафар бола ўлимига сабаб бўлган “Док-1 Макс” сиропи бўйича суд иши бошлангани, ҳиндистонлик судланувчининг адвокати унга нисбатан қўлланилган қамоқ эҳтиёт чорасини ўзгартириб, уни очиққа олиб чиқишга урингани ва бунга жабрланувчилар қаршилик кўрсатгани хабар берилганди. “Дарё” журналисти билан суҳбатлашган жабрланувчиларнинг айтишича, “Док-1 Макс”дан вафот этган болалар сони 65 нафар кўп.
“Док-1 Макс” сиропи сабаб гапиришдан, юришдан тўхтаган ва биринчи гуруҳ ногиронига айланган 5 ёшли Алибек Ўктамовнинг отаси Феруз Нуритдиновнинг айтишича, Олий суд сироп сабаб 65 нафар бола вафот этган деб, рақамларни камайтириб кўрсатмоқда.
Олий суд кўрсатаётган рақамлардан кўпроқ бола вафот этган. Қолаверса, бу сироп сабаб ногирон бўлиб қолганлари ҳам анча, — дейди Алибекнинг отаси.
Феруз Нуритдиновга кўра, унинг боласи 2022 йилнинг декабрь ойида сиропдан заҳарланган. Ва 65 кун комада ётган.
2022 йилнинг декабрь ойи бошларида болам шамоллаб қолгани учун “Док-1 Макс” сиропини ичира бошладик. Ўғлим сироп ичишни бошлашидан уч кун ўтиб, қайд қила бошлади. Нукус шаҳридаги шифохонада боламнинг икки буйраги ишламаётганини айтиб, Тошкентга олиб бориш кераклигини уқтиришди, — дейди у ўғлининг сиропдан заҳарланишини эслар экан.
Жабрланувчининг айтишича, унинг фарзанди сироп сабаб гапиролмайдиган, юролмайдиган ногиронга айланган.
Аллоҳга шукр, менинг болам сиропдан вафот этмади. Лекин сироп сабаб аввал тили айланмай, гапиролмай қолди. Кейин комага тушиб қолиб, 65 кун комада ётди. Шу муддат ичида қўлларининг томири тортиб, қийшайиб қолди. Бошида жарроҳлик амалиёти ўтказилгани сабаб ўзига келди. Лекин бугунги кунга келиб, болам гапиролмайди, ҳаракатлана олмайди. Биринчи гуруҳ ногиронига айланди, — дейди жабрланувчи ота.
Сироп сабаб 5 ёшли ўғлидан айрилган сурхондарёлик жабрланувчи Сирожиддин Ҳасанов суднинг адолатидан умидворлигини айтмоқда.
2022 йил 5 ёшли ўғлим “Док-1 Макс” сиропидан заҳарланган экан. Дастлаб Сурхондарё вилоятидаги Қумқўрғон шаҳар шифохонасига олиб бордик. У ерда шифокорлар нотўғри ташхис қўйишди. Шундан сўнг ўғлимни Термиздаги шифохонага олиб бордик. Термизда болада ўткир буйрак етишмовчилиги борлиги айтилди. Болам сийишдан қолди. Шу сабаб ўғлимни 2022 йилнинг 21 декабрь куни Тошкент шаҳридаги 16-сонли шифохонага олиб келдик. Боламнинг аҳволи оғир бўлгани сабаб, шифохонанинг жонлантириш бўлимига ётқизилди. Бир ҳафта ўтар-ўтмас ўғлим комага тушиб қолди. 2023 йил 23 январгача комада ётди. Ундан сўнг миллий болалар марказида ҳам кома ҳолатида ётди. Шундан сўнг ўғлим вафот этди, — дейди Сирожиддин Ҳасанов.
Отанинг айтишича, улар дастлаб боласи айнан сиропдан заҳарланганини билмаган.
Самарқанддаги воқеа овоза бўлгач, ўша сиропнинг қолган 20-30 грамм қисмини олиб келиб, текширувга бердик. Заҳар чиқди. Беш ой давомида шифохонада эдим. Ҳар куни болалар ўлганига ҳам гувоҳ бўлдик, — дейди у.
Сирожиддин Ҳасанов ҳиндистонлик судланувчи С.Р.П.нинг адвокати Даврон Аҳмадовнинг ҳимояси остидаги айбланувчининг дини, вегетарианлигини рўкач қилиб, унга нисбатан қўлланилган қамоқ эҳтиёт чорасини бекор қилишга уринишини қораламоқда.
Суддан айбланувчиларга олий жазо беришини сўрайман, — дейди боласи ўлган ота.
Суд 16 август соат 10:00 га қадар танаффус эълон қилди.
Изоҳ (0)