Манчестер суди янги туғилган чақалоқларни ўлдиришда айбдор деб топилган ҳамшира Люси Летбини афв этиш ёки шартли равишда озод қилиш ҳуқуқисиз умрбод қамоқ жазосига ҳукм қилди. Бу Британия ҳуқуқ тизимидаги энг қаттиқ ҳукмдир. Бу ҳақда BBC хабар берди.
Тегишли ҳукмда айбланувчининг ҳаракатлари онгли садизм (бировни қийнаб, бундан роҳатланиш) тоифасига киритилган. Летби Англия ҳуқуқи тарихида умрбод қамоқ жазосига ҳукм қилинган тўртинчи аёл бўлди.
Британия тизимида умрбод қамоқ жазосининг икки тури мавжуд.
- Улардан бири (умрбод қамоқ жазоси) маҳкумнинг муддатидан олдин озод қилиш ҳуқуқини назарда тутади. Судья айбланувчи аппеляция ҳуқуқига эга бўлгунга қадар унинг қамоқ муддатини дарҳол аниқлайди.
- Иккинчи тур (умрбодлик тартиби) оғирлиги ва ижтимоий зарари бўйича фавқулодда жиноят содир этилган тақдирда, кўпинча кетма-кет қотилликлар учун тайинланади. Маҳкум муддатидан олдин озод қилиш ёки афв этиш ҳуқуқига эга эмас, бу фақат алоҳида ҳолатларда бўлиши мумкин.
Ҳукм эълон қилинишидан олдин ҳам, Летбининг адвокатлари бу ҳолатда айбланувчининг жазосини енгиллаштириш имкони йўқлигини билдирди.
Летби ҳукм эълон қилинганда суд залида бўлишдан бош тортди.
Британия бош вазири Риши Сунак буни уятли қўрқоқлик деб атади. У ҳукумат маҳкумларни ҳукмда ҳозир бўлишга мажбурловчи қонунчиликка ўзгартиришлар киритишини айтди.
“Янги туғилган чақалоқларнинг ҳаёти бошланган заҳотиёқ йўқ қилинди, уларнинг яқинларининг ҳаёти эса абадий барбод бўлди. Қилмишингиз сабаби фақат сизга маълум”, — деди судья Госс.
Ҳамшира Летби нимада айбланмоқда?
Еттита исботланган қотилликдан ташқари, Летбининг судида унинг айби яна олтита чақалоқнинг ҳаётига суиқасд қилишда ҳам исботланган.
Суд жараёнида кўриб чиқилган яна олти эпизод бўйича судья ҳукм чиқара олмаган.
Люси Летби 2015 йил июнидан 2016 йилнинг июнига қадар Честер касалхонасида ишлаётган вақтида янги туғилган чақалоқларга шприц билан ҳаво юборган. Шунингдек, у ортиқча овқатлантириш ва инсулин билан заҳарлаш каби усулларни қўллаган.
Летбининг баъзи ҳамкасблари биринчи учта ўлимдан кейин ундан гумон қилган. Сабаби барча ҳолатларда, яъни болалар ўлими пайтида у хизматда бўлган.
Бироқ шифохона маъмурияти аввалига буни жиддий қабул қилмаган.
Полиция 2017 йил май ойида чақалоқларнинг ўлими бўйича тергов бошлаган, 2020 йил ноябрь ойида Летбига нисбатан айблов эълон қилинди. Суд 21 август куни ҳамширага нисбатан ҳукм чиқарди.
Буюк Британияда умрбод қамоқ жазоси
Британияда умрбод қамоқ жазоси 1983 йилдан бери қўлланилмоқда. Деярли 20 йил давомида фақат мамлакат ички ишлар вазири бундай ҳукм чиқариши мумкин эди, бироқ 2002 йилда қарор қабул қилиш ваколати судьяларга ўтган.
- Майра Ҳиндли 1990 йилда Британияда умрбод қамоқ жазосига ҳукм қилинган биринчи аёл эди. У қотилликда айбланган ва 2022 йил ҳибсда вафот этган.
- Яна икки нафари — Роуз Уэст ва Жоанн Деннехи — ҳали ҳам жазо ўтамоқда. Уэст 1995 йилда эри Фред Уэст билан 10 та қотиллик учун ҳукм қилинган. Деннехи 2014 йилда уч кишининг қотиллигида айбланган.
Изоҳ (0)