AirAsia компаниясида менежер ёрдамчиси бўлиб ишлайдиган малайзиялик (асли ҳинд) Рашил Каур ҳар куни офисга самолётда қатнайди. Чунки унинг оиласи Пенанг шаҳрида яшайди, лекин иш жойи Сепангда жойлашган. Шаҳарлар орасидаги масофа тахминан 400 километрни ташкил этади.
Каур ҳар куни эрта тонгда — соат 4 да уйқудан туради, фарзандларига нонушта тайёрлагач, аэропортга машинада йўл олади. Унинг иш вақти соат 8 да бошланади. Бир томонлама парвоз ўртача 40 дақиқа давом этади. Офисда бир кун ишлагач, аёл кечки рейс билан уйига қайтади.
Каурнинг айтишича, у ҳар куни фарзандлари билан кўпроқ вақт ўтказиш мақсадида ишга қатнашнинг шу йўлини танлаган. Бунгача у Куала-Лумпурда офисига яқин жойда ижарада яшаган ва оиласини фақатгина дам олиш кунларида кўрган.
“Албатта, ҳар куни эрталаб 4 да уйғониш мени чарчатади. Аммо уйга келиб, болаларимни кўрганимда барча чарчоқларим йўқолади, дейди у.
Рашил Каур 2024 йилнинг январь ойидан бошлаб уча бошлаган. Бу вақт ичида у ҳатто оз миқдорда пул тежашга ҳам муваффақ бўлган. Илгари офис яқинидаги квартирада яшаш учун 474 доллар харажат қилган бўлса, ҳозирда бир кунлик рейслар унга 160 долларга арзонроқ тушади.
Изоҳ (0)