“Менинг қўшним Тоторо” анимесининг бош қаҳрамонлари кўчиб ўтадиган қишлоқдаги шинам уй ёдингиздами? Тез орада шундай уйнинг кичик прототипи ҳар бир аниме ихлосмандлари учун сотувга қўйилиши кутилмоқда.
Япониялик режиссёр Ҳаяо Миязаки асаридаги Сацуки ва Мей исмли опа-сингиллар яшаган уйнинг митти варианти Studio Ghibli томонидан ишлаб чиқилди.
Муаллифлар анимедаги уйни “девордаги бўёқлари хиралашган ва бир нечта қисми шикастланган эски уй”, деб таърифлаган.
Мазкур уй бир нечта бинолардан иборат. Унда шинам хоналар, опа-сингиллар чўмилган ҳаммом, турли анжомлар, тахтача, газ плитаси ва ҳатто раковина билан жиҳозланган ошхона мавжуд.
Уйда Сацуки бенто торт учун махсус қутилар тайёрлаган хона ҳам тасвирланган. Қизлар отасининг кабинети китоблар билан тўла, столда эса Мэй дадасига совға қилган бир қучоқ гуллар турибди.
Уйнинг барча ажойиботларини ўз кўзингиз билан томоша қилиш учун томни олиб ташлаш мумкин. Эшиклар ва деразалар ҳам очилади. Хоналарда ўзгача тароват бахш этувчи ёритгичлар ҳам бор.
Моделнинг ўлчамлари 52,3×27,3×41,8 см бўлиб, 20 июлдан бошлаб тахминан 300 АҚШ доллари нархида сотувга чиқарилади.
Изоҳ (0)