Лос Анжелес шаҳри марказида ўрта ёшли эркак автоматик бошқариладиган роботаксини ўғирламоқчи бўлди, бироқ машина бунга йўл бермади. Бу ҳақда “Правила жизни” хабар бермоқда.
Безори эркак Jaguar I-RASE русумли Waymo электромобилига миниб, уни қўлда бошқаришга уринган, бироқ тизим рухсатномаси йўқ фойдаланувчи машинага чиққанини аниқлагач, роботакси эшиклари қулфланган ва машина полицияга қўнғироқ қилган.
Автомобиль ўғриси бир неча дақиқадан сўнг қўлга олинди. Шаҳар полиция хизмати маълумотларига кўра, ҳодиса вақтида эркак маст ҳолатда бўлган.
Автоном транспорт тизимларини ишлаб чиқарадиган Waymo компанияси таъкидлашича, бу ҳолат биринчи марта содир бўлиши эмас. Автоном машиналарни рухсатсиз бошқаришга бир нечта уринишлар қилинган, аммо бирор марта ушбу русумли электромобиллар ўғирланмаган.
“Waymo машиналари рухсатномаси йўқ шахсларнинг автоном ҳайдаш тизимини бекор қилишига ва транспорт воситаларини қўлда бошқаришига йўл қўймайди”, дейилади компания баёнотида.
Бегона шахс ҳайдовчи ўриндиғига ўтирса, Waymo’нинг қўллаб-қувватлаш тизими ундан транспорт воситасидан чиқиб кетишни ва сўрайди. Агар ушбу талаб бажарилмаса, система ҳуқуқни муҳофаза қилувчи идоралар билан ҳамкорликда ишлайдиган фавқулодда вазият режимини ёқади ва полиция билан боғланади.
Маълумот учун: Waymo компанияси бугунги кунда автоном машиналар технологиясини ривожлантиришда илғор позицияда, у ўзининг бир нечта экспериментлари ва синов лойиҳалари орқали катта тажриба тўплади. Компания бир неча йилдан буён автоном роботаксиларни маълум ҳудудларда муваффақиятли ишга туширган.
Waymo хизматидан аввал чекланган миқдордаги шахслар фойдаланиши мумкин эди. Ҳозирда мазкур хизматдан Лос Анжелес, Сан Франциско ва Феникс шаҳарлари аҳолиси ҳам фойдаланиши мумкин.
Waymo технологиясининг асосий компонентлари орасида сунъий интеллект, сенсор, Lidar (Light Detection and Ranging) технологиялари ва бошқа илғор тизимлар мавжуд. Бу технологиялар автоном робомашиналарнинг ўз йўли бўйлаб хавфсиз ҳаракатланишига, атроф-муҳитни таҳлил қилишга ва ҳайдовчининг ўрнини тўлиқ эгаллашга имкон беради.
Изоҳ (0)