Ўзбекистон халқ ҳофизи, ширали овоз соҳиби Оролмирзо Сафаров кўзи ожиз бўлишига қарамай, ўзбек халқининг суюкли ҳофизидир. Оролмирзо Сафаров “Дарё”га берган интервьюсида оиласи, ҳозирги бемаза қўшиқчилар ва туғма ожизлиги бор инсонлар ҳақида гапирди.
“Айрилиқ азобини керагидан кўп тотдим”
— Учта фарзандим бор, аёлимнинг исми Сайёрахон, уй бекаси. У ижодкор эмас, ижодкорни илҳомлантирувчи восита (кулиб). Тўнғич фарзандим қизим, Англияда нуфузли университетда таҳсил олиб келган, ҳозирда вилоятлар бўйлаб хизмат сафарларидан ортмайди, иши яхши. Музаффар ўғлим Тошкент халқаро Вестминстер университетида ўқиб, таржимон бўлиб ҳам ишлаяпти. Кенжа фарзандим Бахтиёржон ҳали боғча тарбияланувчиси, жуда шўх бола. Ота-онамдан сўнг тўрттагина ака-ука қолдик. Айрилиқ, фироқ, ҳижрон азоблари керагидан кўп бўлди. Албатта, бу Аллоҳнинг иродаси.
“Отанг ўлиб қолса ҳам, хизматга чиқ!”
— Раҳматли устозларимиз хизмат олган кунингда отанг ўлиб қолса, устига ёпинчиқ ёпгин-да, билдирмасдан хизматингни қилиб, кейин бориб отангни кўм, дейишган. Санъаткорларнинг шиори шундай қаттиқ. Ҳозир қўштирноқ ичидаги юлдузларга тегишли эмас бу гаплар.
Ҳозир чиқиб келаётган ёш хонандаларнинг битта яхши қўшиғини эшитасиз-да, энди умид қилиб турган вақтингизда иккинчи қўшиғиданоқ айнишни бошлайди. Яхши овози билан халққа манзур бўлиб олади-да, ёмғирдан кейин чиққан қўзиқорин, бодроқдай бир-биридан кўпайиб кетадики, шу ашулачидан кўнглингиз айниб кетади, тўғриси. Нега десангиз, сабаби устоз кўрмаганликда эмас. Устоз кўрганлари ҳам шунақа. Чунки устознинг айтганини ҳам, қилганини ҳам қилмайди улар. Гўёки улар онасидан туғма юлдуз бўлиб туғилган. Шунчаки диплом учун ўлганнинг кунидан ўқийди. Устозни қўлида ўқиб турган, лекин куфрона неъмат шогирдлар кўпайиб кетди. Хафа бўлишмасин, юзга айтганнинг заҳри йўқ. Санъатнинг нонини мендан кўпроқ еган, мендан кўпроқ кўйлак йиртган устоз санъаткорлардан сўраб кўринг, хато дейишса, шу гапларимни бермасангиз ҳам розиман.
“Кўзим кўрмаса-да, бошқа қобилиятларим кўп”
— Мен ҳаётимда содир бўладиган ҳеч бир нарсани деярли бееътибор қолдирмайман. Вақт — олий ҳакам, инсон умрига ўз ҳукмини ўтказар экан. Шу жумладан, хотирага ҳам ёш нуқтайи назаридан ўз таъсирини ўтказади. Ёшим анча катта бўлса ҳам, ҳаётимдаги воқеаларни 80-90 фоиз йил, ой, кунигача ёддан айтиб бероламан. Аллоҳ бандасини хоҳлаган бир тарафидан нуқсонли қилиб яратади, беайб ўзи. Дунёда 8 миллиард инсон яшайдиган бўлса, юз фоиз соғломман дейдиган инсоннинг ҳам бошқаларга сезиладиган бир нуқсони, камчилиги бўлади. Кўриш қобилиятидан маҳрум бўлганимиз билан, Аллоҳ бошқа 99 тарафдан бизга бериб қўйган.
Айниқса, зеҳн, хотира, истеъдод, иқтидор борасида биз бандаларнинг Яратгандан нолишга ҳаққимиз йўқ. Масалан, менинг ёзма нутқим яхши эмас, аммо оғзаки гаплашсам, фикрлар ўз-ўзидан қуйилиб келаверади. Бунинг сабабчиси мен эмас, қалбимизнинг наққоши бўлган Аллоҳ. Илҳом берадиган ҳам, сайратадиган, яйратадиган ҳам, забон бериб, азиз-у мукаррам қилган ҳам ўзи. Францияда яшаб ўтган педагог Луи Брайлнинг инсоният учун қилган энг катта яхшилиги кўзи ожизлар алифбосини ўйлаб топгани. Унинг дини, ирқи, мансаби ва кўзи ожизлигидан қатъи назар Яратган унга шу яхшиликни бериб қўйибди.
Суҳбатни тўлиқ ҳолда “Дарё” Lifestyle YouTube каналида томоша қилинг.
Изоҳ (0)