Бизнес-магнат Ратан Тата 86 ёшида Мумбайда вафот этди. Унинг ҳеч қачон оиласи ва фарзандлари бўлмаган. Ўлимидан икки ҳафта ўтгач, у бойлигининг катта қисмини (118 миллион доллар) севимли ити — Тито лақабли немис овчаркасига, бир қисмини эса бош ёрдамчиси Конар Суббиаҳга ҳамда ошпази Ражан Шоуга васият қилгани маълум бўлди. Тата мулкининг жуда кам қисмини ака-ука ва опа-сингилларига қолдирган.
Ратан Тата ўз васиятномасида унинг уй ҳайвонига “чексиз ғамхўрлик қилиш” шартлигини кўрсатди. Тадбиркорнинг сўзларига кўра, унинг ити ўлимигача Ратаннинг ёнида бўлган, деб ёзади Тhе Times нашри.
Ҳиндистонлик бизнесмен бутун умри давомида ҳайвонларга нисбатан ўзининг раҳм-шафқати ва меҳри билан ажралиб турган. Tata Group штаб-квартирасидаги дарвозабонларга ҳеч қачон қаровсиз ҳайвонларни орқага қайтармаслик кераклиги айтилган. Ратаннинг яқин дўсти Суҳел Сетнинг сўзларига кўра, Титога ғамхўрлик қилаётган ёрдамчи ва ошпазга қолдирилган маблағ миқдори жуда катта:
“Эндиликда улар умри давомида ҳеч қачон ишлашга мажбур бўлмайди”, дейди тадбиркорнинг дўсти.
Ҳиндистон бош вазири Нарендра Моди Татани “бизнес лидери, раҳмдил инсон ва буюк шахс” деб атади.
Ратан Тата 1937 йилда Бомбейда (ҳозирги Мумбай) туғилган. У ёшлигида меъмор бўлишни орзу қилган ва АҚШда яшаб юрган пайтида уни тарбиялаган бувиси уйга қайтиб, оилавий бизнесда ишлашни илтимос қилган. Шундай қилиб, Татанинг TISCО номли туз ва пўлат ишлаб чиқарувчи компаниясидаги фаолияти бошланган. 1991 йилдан бошлаб Тата оилавий бизнесни бошқара бошлади ва йиллар давомида корхона 100 дан ортиқ компанияларни бирлаштирган йирик корпорацияга айланди.
Изоҳ (0)