Испанияда икки аёлдан умумий ҳисобда 360 минг АҚШ доллари миқдорда пулни алдов йўли билан ўзлаштирган беш нафар жиноятчи қўлга олинди. Фирибгарлар ўзларини Голливуд актёри Бред Питт деб таништирган.
Кибержиноятчилар актёр Бред Питтга бағишланган фанатлар гуруҳи ичидан ўзига қурбонлар излаган. Улар ижтимоий тармоқлар орқали потенциал қурбонларнинг психологик портретини тузган ва руҳий тушкунлик, депрессия аломатлари мавжуд, ҳиссий жиҳатдан заиф аёлларни саралаб олган.
Сўнг улар билан мессенжер ёки электрон почта орқали боғланган. Фирибгарлар содда аёлларга актёр номидан романтик мавзуларда ёза бошлаган ва уларга гўёки қўшма лойиҳалар учун сармоя киритишни таклиф қилган. Уларнинг сўзларига ишонган икки нафар жабрланувчи аввалига 5-6 минг евродан пул ўтказмаларини амалга оширган.
2023 йил август ойида Гранада шаҳридан алданган аёл ҳуқуқ-тартибот идораларига мурожаат қилгач, текширув ишлари бошланган. Кейинчалик, бискаялик аёл билан ҳам худди шундай ҳолат содир бўлгани аниқланган.
“Бралина” деб номланган тергов операцияси давомида жабрланувчиларга ўғирланган пулларнинг бир қисми — 95 минг доллар миқдори ундириб берилди. Ҳозирда тергов ҳаракатлари давом этмоқда.
Бундан ташқари, гранадалик аёлнинг ўғли онасининг ҳисобидан 17 минг евро ўғирлагани маълум бўлди, аммо полиция сўзларига кўра, бу ҳолатнинг киберфирибгарларга алоқаси йўқ.
Изоҳ (0)