Венсес Палау Фернандес исмли барселоналик эркак ўзининг энг катта мобил телефонлари коллекцияси билан Гиннес рекордлари китобига киритилди. Унинг тўплами 3615 та ноёб мобил қурилмалардан иборат.
Фернандес 1999 йилда янги йил байрами совғаси сифатида Nokia 3210 русумли телефонини олган, шундан сўнг эркакда уяли телефонларга катта иштиёқ пайдо бўлган. 2008 йилдан бошлаб у Финляндия брендига мансуб мобил телефонларни йиғишни бошлаган, кейинчалик тўпламга бошқа брендлар ҳам киритилган ва охир-оқибат рекорд даражадаги коллекцияга айланган.
Палау сўзларига кўра, у аввалига доимий янги чиққан телефон брендларини мунтазам харид қилган, маълум вақт ўтиб у бу ҳоббини бир йилга ташлаб қўйган. Кейинроқ рекордчи ўзининг севимли машғулотига бошқа мақсад билан қайтди: эндиликда Фернандес нафақат бозорда мавжуд мобил телефонлар, балки уларнинг сотувга чиқмаган прототипларини ҳам йиғишга тушди.
Тўпламида Siemens, NEC, Motorola, Blackberry, Samsung, HTC, Apple ва бошқа кўплаб брендларга тегишли телефонлар мавжуд. Уларнинг баъзилари чекланган миқдорда ишлаб чиқарилган. Масалан, “Юлдузлар жанги” фильмига монанд дизайнда ишлаб чиқилган Йода, Оби-Ван Кеноби каби қаҳрамонлар услубидаги телефонлар шулар жумласидандир.
“Менинг коллекциямда камёб ва чекланган миқдорда ишлаб чиқарилган телефон моделлари мавжуд. Менинг ҳоббийим катта сабр ва молиявий ҳаракатлар натижасидир. Тўплам ҳали ўз ниҳоясига етмаган, шу сабабли мен уни иложи борича кенгайтиришда давом этмоқчиман”, дейди Венсес Палау Фернандес.
Бундан аввал худди шу рекорд ўтган йили Руминия фуқароси Андрей Билби Аржентис томонидан ўрнатилганди. Унинг тўплами 3456 та телефондан иборат эди.
Изоҳ (0)