Песто лақабли қирол пингвин боласи ўзининг ғайриоддий кўриниши билан ижтимоий тармоқ фойдаланувчиларини қувонтириб келмоқда. 9 ойлик Пестонинг вазни 22 килограмм бўлиб, бу кўрсаткич пингвин туғилган жой — Австралиянинг Мелбурн шаҳридаги Sea Life аквариуми учун янги рекорддир.
Sea Life вакилларининг қайд этишича, ижтимоий тармоқларда Песто тасвирланган видеоларни бутун дунёдан 2 миллиардга яқин одам томоша қилган. Пахмоқ пингвин ўзининг жозибали кўриниши билан фойдаланувчиларни ҳайратда қолдирди. Кўплаб инсонлар Пестога илиқ сўзлар ёзиб қолдирмоқда ва пингвин билан яқиндан танишиш учун Sea Life аквариумига ташриф буюрмоқда.
Аквариум мутахассислари Пестонинг “иштаҳаси карнай” эканлигини ҳам таъкидлаб ўтди: Песто кунига 25 та балиқ истеъмол қилади. Аммо унинг соғлиғидан ташвишланишнинг ҳожати йўқ. Мутахассисларнинг фикрига кўра, Пестонинг организми катта миқдорда озиқ-овқат талаб қилиши бундай турдаги пингвин учун нормал ҳолатдир ва ҳатто қирол пингвиннинг шиддат билан ўсиб бораётган организми учун фойдалидир.
Пестонинг бундай катта вазни унинг генетикаси билан боғлиқ бўлиши мумкин, улғайгани сари у 15 килограммгача вазн ташлаши мумкин. Таққослаш учун, пингвиннинг ота-онаси Ҳадсон ва Тангонинг вазни 11 килограммдан.
Қирол пингвин 31 январда туғилган ва унинг яхши ўсиб-ривожланишига ҳайвонот боғидаги қулай яшаш шароитлари, қатъий эътибор ва парвариш сабаб бўлган. Песто улғайгани сари аста-секин жигарранг патларини тўка бошлайди ва бошқа пингвинлар каби силлиқ танага эга бўлади. Қушнинг бутун дунёдан мухлислари тез орада унинг оқ ва қора тусга кирган суратларини кўришни кутиб қолмоқда.
Изоҳ (0)