Airbnb номли бутун дунё бўйлаб уй-жойларнинг ижараси ҳақидаги маълумотлар жойлашган платформада “Бошқотирма” мультфильмидан илҳомланиб қурилган уй ижарага берилди.
У АҚШнинг Лос Анжелес шаҳрида жойлашган. Уйга талаб шунчалик каттаки, ҳозирча у ерда турар жойни брон қилишнинг имкони йўқ: сайтда яқин бир неча ойга бўш жой йўқлиги айтилган.
Уйга кираверишда аввал “Қувонч” хонаси (Райлининг бошида яшайдиган кўплаб ҳис-туйғулардан бири) сизни кутиб олади.
Мазкур уйда Райли учун бош офис ҳам мавжуд бўлиб, у ердан “бош қаҳрамон ҳиссиётларини бошқариш” мумкин бўлади.
“Бошқотирма” мультфильми услубидаги уй 24 кун ичида қуриб битказилган. Унинг иккита ётоқхонаси бор: бири сариқ (бу Қувонч хонаси), иккинчиси эса янги қаҳрамон — Хавотирнинг бинафша ва олов рангдаги хонасидир. Эълонда айтилишича, агар сиз Қувончнинг ётоқхонасида бир кеча вақтингизни ўтказсангиз, барча ташвишларингиздан халос бўлишингиз мумкин.
Шунингдек, уйда иккита ҳаммом ва бошқарув маркази услубида яратилган меҳмонхона ҳам мавжуд бўлиб, унинг атрофида Райлининг энг ёрқин хотираларини ифодаловчи порлаб турувчи чироқли шарлар ўрнатилган. Airbnb сайтида айтилишича, меҳмонлар мазкур уйда ўз хотираларидан иборат шар яратиб, уни ўзлари билан бирга олиб кетишлари мумкин.
Ушбу уйда Райлининг бошқа ҳиссиётлари учун мўлжалланган хоналар ҳам бор. Масалан, Қайғу услубидаги хонанинг шифтида булут кўринишидаги лампалар осилган ва уларнинг усти кўз ёшлари кўринишида кўк рангли декор билан безатилган.
Airbnb платформасида турли фильмлар сюжетидан илҳомланиб қурилган уйлар ҳақида эълонлар тез-тез учраб туради. Ню Мексико штатида жойлашган “Юқорига” мультфильмидаги барча элементлар мавжуд учар уй шулар жумласидандир.
Pixar ва Disney’нинг “Бошқотирма-2” анимацион фильмининг биринчи қисми 2015 йилда намойиш этилган, унда Райли исмли қизалоқнинг миясида яшайдиган бешта ҳиссиёт: Қувонч, Қайғу, Қўрқув, Ғазаб ва Хавотир ҳақида ҳикоя қилинади. Райли аста-секин улғайиб боради, бу унинг ҳис-туйғуларини хотирасида сақлаб қолишга ва ҳалокатли ўзгаришларнинг олдини олишга ёрдам беради.
Изоҳ (0)