2004 йилда Facebook ижтимоий тармоғига асос солган дастурчи Марк Цукерберг 40 ёшга тўлгани муносабати билан ўзига 300 миллион долларлик ҳашаматли яхта сотиб олди. Куни кеча миллиардер ўзининг янги яхтасида Ўрта Ер денгизида жойлашган Майорка ороллар яқинидаги Балеар денгизида дам олмоқда, деб ёзди El País.
Яхта Палма де Мальорка кўрфазида эътиборга тушган. Марк Цукерберг отаси Эдварднинг 70 ёшини нишонлаш учун яқин қариндошлари ва дўстлари билан бирга Балеар ороллари томонга сузиб кетди.
Янги Launchpad яхтасининг узунлиги 118 метр, эни 15 метр бўлиб, Монаконинг Espen Oino International компанияси томонидан лойиҳалаштирилган ва Голландиянинг Feadship компаниясининг махсус буюртмаси асосида ишлаб чиқарилган. У 24 нафар йўловчи ва 48 нафар экипаж аъзоларини сиғдира олади. Яхтанинг қиймати 300 миллион долларга баҳоланган.
Кема оқ ва тўқ кўк рангдаги учта палубага эга, унинг бош қисмида теннис корти, орқа томонида эса вертолёт учун махсус майдон бор. Шунингдек, яхтада денгиз бўйида овқатланиш имконини берувчи ойнали терраса ҳам мавжуд.
Изоҳ (0)