Япониялик эркак қарор қабул қилишни истисно қиладиган турмуш тарзига риоя қилиш натижасида иш самарадорлигини оширди, деб ёзади “Правила жизни”. У 15 йил давомида бир хил овқат истеъмол қилган, бир хил кийинган ва қатъий кун тартибига амал қилиб яшаган.
38 ёшли Гуо Китанинг сўзларига кўра, у офисда ишлай бошлаганида доимий бирор майда юмушни ҳал қилиш заруратига дуч келган. Шу сабабли япониялик шахсий ҳаётида қабул қиладиган қарорлар сонини камайтириш йўлини излаб топган.
У собиқ бейсболчи Ичиро Сузуки Китадан ўрнак олган. Спортчи етти йил давомида қатъий режимга риоя қилган. Натижада у мусобақа вақтида диққатини фақат ўйинга қаратишга ва биргина мавсумда камида 200 марта кетма-кет ўнта зарба беришга муваффақ бўлган. Бу кўрсаткич Бейсбол олий лигаси учун рекорддир.
Кита бейсболчидан илҳомланиб, нонуштага ёнғоқ ва рамён, тушликда товуқ гўшти, кечки овқатда эса қовурилган чўчқа гўшти ва ловия истеъмол қила бошлади. Эркак доим бир неча хил футболка ва шим кияр, янги услубдаги нарсаларни харид қилмас эди. У ҳар бир кундалик юмушлари — ҳатто соқол олиш ва ювиниш каби майда ишлар учун алоҳида вақт белгилаган ва унга ўн беш йил давомида қатъий риоя қилиб келган.
Япон фуқаросининг фикрича, бундай турмуш тарзи туфайли у руҳан камроқ чарчаган, стресс миқдори камайган. Энг асосийси, қарор қабул қилишни чеклайдиган мазкур қатъий режим унга аниқроқ фикр юритиш ва ишда самаралироқ бўлиш имконини берган.
Изоҳ (0)