Флорида шаҳрида яшовчи 68 ёшли нафақага чиққан аёл уч йил давом этадиган дунё бўйлаб круиз саёҳати харид қилди. Круизда иштирок этиш учун аёл ўзининг бор мол-мулки ва уйини сотиб юборди, аммо саёҳат пайтида унинг WhatsApp иловасидаги шахсий хабарлари тарқалиб кетганидан кейин кекса аёлни кемадан ҳайдаб юборишди. Эндиликда унга бортга чиқишга рухсат берилмайди, деб ёзади Daily Mail.
Икки фарзанд онаси, муқаддам ажрашган Женни Феникс исмли аёл Европа, Осиё ва Америка қитъалари бўйлаб сузиб ўтадиган Villa Vie Odyssey кемасида саёҳат қилишга қарор қилди. Бунинг учун нафақахўр 350 минг доллар тўлади.
Феникс билан бирга мингдан ортиқ йўловчилар ҳам ушбу саёҳатда иштирок этиши лозим эди. Кема турли қитъалар бўйлаб 375 та шаҳарда тўхташи, дунёнинг 13 та мўжизасини зиёрат қилиши керак эди. Круизинг расмий веб-сайтида меҳмонлар ҳашаматли хоналарда яшаши, кир ювиш жойлари, соғломлаштириш маркази, турли салонлар ва хордиқ чиқариш хоналари билан таъминланиши қайд этилган.
Шунингдек, круиз вақтида турли мавзуда маърузалар ўқилиши, кинотеатр ва байрамлар ташкил қилиниши ҳам ваъда берилган эди. Аммо саёҳатчиларнинг қувончи узоққа чўзилмади. Кема таъмирлаш ишлари учун Белфаст портига келиб тўхтади. Натижада барча йўловчилар каби Женни Феникс бир неча ой Ирландияда ўз ҳисобидан қолиб кетди.
Ваъда қилинган шарт-шароитлар яратилмагани ва саёҳат узоқ вақтга тўхтаб қолгани туфайли норози бўлган йўловчилардан бири Женни Феникс WhatsApp мессенжери орқали саёҳатчилар гуруҳига ўз шикоятларини билдирган. Унда аёл кеманинг ҳолатидан хавотирланаётгани ва кема денгизга чиққандан кейин ҳам таъмирлаш ишлари давом этиши кераклигини билиб қолгани ҳақида хабар берган. Бунинг устига, унинг кабинаси экипаж томонидан вақтинча банд қилиб қўйилгани ҳақида ҳам ёзган.
Мессенжердаги шахсий суҳбатлар номаълум шахслар томонидан Villa Vie Residences кемаси эгаларига етказилди ва компания аёл билан шартномани бекор қилишга қарор қилди.
“Сизнинг доимий шикоятларингиз йўловчиларнинг кайфиятига салбий таъсир қилмоқда. Шу сабабли биз круиздаги иштирокингизни бекор қилишга мажбурмиз”, деди компаниянинг бош операцион директори Кети Виллалба.
Женни Феникс бу қарордан ҳайратда қолди. Аммо аёл ҳеч қачон ҳеч кимга қўполлик ёки ҳурматсизлик қилмаганини ва шахсий ёзишмаларини ижтимоий тармоқларда чоп этилмаганини таъкидлади. Аёл фақатгина норози бўлган саёҳатчилардан бири эканини айтди.
Қаршиликларга қарамай, Фениксни кемадан тушириб қолдиришди ва унга саёҳатдан тушган пулнинг бир қисми қайтариб берилди. Сўнг аёл Флоридага қайтишга мажбур бўлди. Ҳозирда Женни хоним қизининг уйида вақтичалик яшамоқда.
Изоҳ (0)