Эътибор берганмисиз, замонавий супермаркетларнинг ҳеч бирида деразалар бўлмайди ёки жуда юқори ўрнатилади? Катта дўкон биносининг архитектура жиҳатдан бундай қурилиши аввалдан режалаштирилган ҳийладир.
Биринчи сабаб: озиқ-овқатни салқин бинода сақлаш лозим
Баъзи маҳсулотлар қуёш нури таъсирида ўз сифатини йўқотади. Масалан, Германияда қурилган биринчи супермаркетларда деразалар бўлган ва очиқ жавонларда турган қандолат маҳсулотлари ултрабинафша нурлари остида эрий бошлаган. Шунингдек, маҳсулотнинг сифати бузилмаса-да, унинг ёрлиғи қуёш таъсирида очаради ва ёзувлар ўчиб кетади. Бу эса яроқлилик муддати яхши бўлишига қарамай, маҳсулот сотилмай қолишига олиб келади.
Иккинчи сабаб: маҳсулотларни шундай тарзда намойиш қилиш осон
Деразалар ўрнатилиши ортиқча жойни олади ва у ернинг ўрнига бошқа маҳсулотларни териб қўйиш имкониятидан маҳрум қилади. Маржин Бисвас исмли архитектор тушунтиришича, деразаларсиз қурилган бино деворлари мустаҳкам бўлади ва жавонларда турли оғирликдаги юкларни кўтара олиш имкониятини беради.
Учинчи сабаб: деразаларни ўрнатиш қимматга тушади
Деразасиз бино қуриш супермаркет раҳбарияти учун молиявий жиҳатдан фойдалироқдир. Чунки иссиқлик ва ултрабинафша нурланиш таъсирини камайтирадиган махсус ойналар ўрнатиш катта маблағни талаб этади. Қурилиш харажатларини тежашни афзал кўрган тадбиркорлар супермаркет биносини деразасиз қуришни афзал кўради.
Тўртинчи ва энг асосий сабаб: бу сизни кўпроқ маҳсулотлар сотиб олишга туртки беради
Агар дўконларда деразалар қўйилса эди, харидорлар маҳсулотларни танлаш вақтида турли ишларга чалғиган бўлар эди. Супермаркетга ташриф буюрган инсонлар худди ташқи дунёдан ажралиб, бошқа маконга тушиб қолгандек бўлади: ташқарида ёғаётган ёмғир, машинада ўтириб онасининг қайтишини кутаётган болалар кабилар уларни харид қилишдан чалғитмайди. Барча диққат ва эътибор маҳсулотларга қаратилади. Жавонларда бир текис ва чиройли тахланган озиқ-овқат маҳсулотлари эса кўзни қувнатади ва натижада биз режалаштиргандан кўра кўпроқ ва ортиқча маҳсулотларни харид қиламиз.
Шунинг учун кейинги сафар супермаркетга борганда режалаштирилмаган харидлар қилмаслик учун психологлар телефонга будилник ўрнатиш ва керакли маҳсулотлар рўйхатини аввалдан тузишни тавсия қилади.
Изоҳ (0)