Лондонда биринчи Гиннес рекордлари китоби нашр этилганининг 30 йиллиги ҳамда Жаҳон рекордлар куни нишонлана бошлаганининг 20 йиллиги муносабати билан махсус байрам бўлиб ўтди. Савой меҳмонхонасида икки рекордчилар учун инглиз анъаналарига хос чой маросими ташкил қилинди. Унда дунёдаги энг баланд бўйли ва энг паст бўйли аёллар учрашди.
Бугунги кунда сайёрамиздаги энг баланд аёл туркиялик 27 ёшли Румейса Гелги ҳисобланади. У Гиннес рекордлари китобига 2021 йилда киритилган ва мазкур унвонга эга бўлган. Румейсанинг бўйи 215 см. Унга камёб касаллик — Уивер синдроми ташхиси қўйилган. Касаллик тананинг ҳаддан ортиқ тез ўсишига ва суяк деформациясига олиб келади.
Бутун дунёда шунга ўхшаш аномал ҳолатлардан яна 50 таси маълум. Туркияда бундай синдром билан оғриган одам фақатгина Гелги ҳисобланади. Унинг скелети деформациялангани сабабли рекордчи ногиронлар аравачаси орқали ҳаракатланади. Оёққа туриш учун эса махсус қўлтиқтаёқдан фойдаланади. Румейса уйда таълим олган ва ҳозирда веб-дизайнер бўлиб ишлайди.
Дунёдаги энг кичик аёл ҳиндистонлик 30 ёшли Жоти Амжи ҳисобланади. Унинг бўйи 62 см бўлиб, болалигида Жотига ахоедроплазия ташхиси қўйилган. Рекордчининг овози ёш қизчаларникидек ингичка. У ўзининг ноодатий ташқи кўриниши орқали машҳур блогер ва актрисага айланган.
Жоти ўзининг бошқаларга ўхшамаслигидан қайғурмаслигига унинг шифокор ота-онаси сабабчи. У болалигидан ўзига хос уникал инсон эканлигига ишонган ва бу ишонч унга актрисалик фаолиятини танлашига туртки бўлган. Ижтимоий тармоқ юлдузига айланган Амжи “American Horror Story” сериалида суратга тушди.
Лондонда ташкил этилган маросимда икки рекордчи аёл бир-бирини кўришдан жуда мамнун бўлди.
“Мен доим юқорига қараб одамлар билан гаплашишга аллақачон одатланиб қолганман, лекин бугун бошимни кўтариб, дунёдаги энг баланд аёлни учратганимдан бениҳоят хурсанд бўлдим”,
деди Амжи табассум билан.
“Баъзида бўйимиздаги катта фарқ туфайли бир-биримизнинг кўзларимизга қараш қийин бўлди, лекин бугунги учрашув жуда ажойиб руҳда ўтди”,
деди Гелги.
Румейса ва Жоти Гиннес рекордлари китобининг рамзий белгиси билан тақдирланди. Шунингдек, ушбу мақтов белгиси сайёрадаги энг баланд эркак — туркиялик Султон Косен, энг узун тирноқли аёл — америкалик Диана Армстронг кабиларга ҳам тақдим этилди.
Гиннеснинг рекордлар китоби бош муҳаррири Крейг Глендей ҳам ушбу учрашувга ташриф буюрди. Унинг сўзларига кўра, китоб инсониятнинг турфа оламини ноёб ҳодиса сифатида нишонлаш учун хизмат қилади.
Изоҳ (0)